Մոսկվայի Սուրբ Պայծառակերպության Մայր Տաճարում Ռուսաստանի և Նոր Նախիջևանի հայոց թեմի առաջնորդ Եզրաս արքեպիսկոպոս Ներսիսյանի հանդիսապետությամբ պատարագ է մատուցվել՝ նվիրված Հայոց ցեղասպանության 109-րդ տարելիցին:

«Արմենպրես»-ի թղթակցի հաղորդմամբ՝ Մոսկվայում կատարվել է նաև Հայոց ցեղասպանության Սուրբ նահատակների փառաբանության կարգ, որին ներկա են եղել Ռուսաստանի Դաշնությունում ՀՀ դեսպանատան պատասխանատուներ, հայ համայնքի ներկայացուցիչներ:

Հավատավոր ժողովրդին ուղղված իր խոսքում Ռուսաստանի և Նոր Նախիջևանի հայոց թեմի առաջնորդ Եզրաս արքեպիսկոպոս Ներսիսյանը նշել է, որ Մեծ եղեռնի՝ դեռևս չսպիացած վերքին ավելացել է Ադրբեջանի ցեղասպան գործողությունների հետևանքով արցախահայության բռնի տեղահանումը:

Նա ասել է, որ 2023 թվականին ականատես եղանք նոր ցեղասպանության, երբ միջազգային հանրության լուռ հայացքի ներքո հայաթափվեց Լեռնային Ղարաբաղը։

Ռուսաստանի և Նոր Նախիջևանի հայոց թեմի առաջնորդը հավելել է, որ Հայաստանի սահմանները նույնպես հանգիստ չեն, և հայ ժողովրդին համախմբվելու կոչ է արել։

Պատարագից հետո տեղի է ունեցել Հայոց ցեղասպանության զոհերի հիշատակին նվիրված հուշակոթողին ծաղիկների և ծաղկեպսակների տեղադրման արարողություն: Այնուհետև օրվա խորհրդով եկեղեցական համալիրի տարածքում գործող «Տապան» թանգարանում բացվել է վավերագրական լուսանկարների ցուցահանդես: Այսօր հիշատակի միջոցառումներ են կազմակերպել նաև ՌԴ այլ քաղաքներում գործող հայկական կազմակերպությունները: