Տավուշի և Ղազախի հատվածում սահմանազատման գործընթացը տեխնիկապես ավարտվել է, «Ազատության» հետ զրույցում տեղեկացրել է ԱԺ պաշտպանության հանձնաժողովի նախագահ Արմեն Խաչատրյանը։
«Տեխնիկապես ավարտվել, նշանակում է, որ արձանագրվել, վերահաստատվել է այն հատվածը, որով անցնում է հայ-ադրբեջանական սահմանը՝ համաձայն Ալմաթիի հռչակագրի։ Այսինքն Խորհրդային Հայաստանի և Խորհրդային Ադրբեջանի սահմանի անցման կետերում են այդ սյուները տեղադրված», – նշել է Խաչատրյանը։
Կառավարությունը երեկ հայտարարել է, որ Հայաստան- Ադրբեջան սահմանին տեղադրվել է 20 սահմանային սյուն։
Թե քանի կմ տարածք է սահմանազատվել, պաշտոնապես չի հաստատվել։ Սակայն իշխող «Քաղաքացիական պայմանագրի» պատգամավորները «Ազատության» հետ զրույցում նշել են, որ խոսքը 10-12 կմ մասին է։
ՔՊ-ական Վահե Ղալումյանը` Տավուշի մարզպետ Հայկ Ղալումյանի եղբայրը, ասել է, թե, իր տեղեկություններով, սյուների միջև հեռավորությունը 500 մետր է։ Եթե արդեն 20 սյուն է տեղադրվել, ուրեմն խոսքը մոտ 10 կմ-ի մասին է, որն արդեն սահմանազատված կարելի է համարել։
