Ուկրաինայի զինված ուժերի գլխավոր հրամանատար Ալեքսանդր Սիրսկին իր տելեգրամյան ալիքում ծավալուն գրառում է հրապարակել, որում գրում է ռազմաճակատում իրավիճակի սրման և ռուսական զորքերի մարտավարական հաջողությունների մասին։

«Իրավիճակը ճակատում սրվել է: Փորձելով գրավել ռազմավարական նախաձեռնությունը և ճեղքել առաջնագիծը՝ հակառակորդն իր հիմնական ուժերը կենտրոնացրել է մի քանի ուղղությամբ՝ ստեղծելով ուժերի և միջոցների զգալի առավելություն։

Նա ակտիվորեն գրոհում է առաջնագծի ողջ երկայնքով, որոշ ուղղություններով ունի մարտավարական հաջողություններ»,- գրել է գլխավոր հրամանատարը։

Միևնույն ժամանակ, Սիրսկին նշել է, որ իրավիճակը շատ արագ փոխվում է, «որոշ ​​դիրքեր օրվա ընթացքում մի քանի անգամ «ձեռքից ձեռք են անցնում», ինչի հետևանքով իրավիճակն ընկալվում է ոչ միանշանակ»։

Առավել վտանգավոր է համարվում Օչերետինոյի մոտ ռուսական բանակի առաջխաղացումը:

Կիրակի ՌԴ ՊՆ-ն հայտնել է, որ ռուսական բանակին հաջողվել է վերահսկողության տակ վերցնել Օչերետինոյի հարավ-արևելքում գտնվող Նովոբախմուտովկա բնակավայրը։ Ուկրաինացի զինվորականները չեն հաստատել այդ տեղեկությունը:

Լարվածությունը չի մարում նաև հարավում՝ Զապորոժիեի և Խերսոնի շրջաններում, որտեղ ռուսական զորքերը փորձում են առաջ շարժվել, բայց, ըստ Սիրսկու, հաջողության չեն հասնում։

Պատերազմի ուսումնասիրության ամերիկյան ինստիտուտի (ISW) վերլուծաբանները գրել են, որ առաջիկա շաբաթներին, մինչ Ուկրաինան սպասում է ամերիկյան ռազմական օգնությանը, ռուսական զորքերը, ամենայն հավանականությամբ, մարտավարական նշանակալի ձեռքբերումների կհասնեն, բայց դժվար կարողանան ճեղքել Ուկրաինայի պաշտպանությունը:

Ուկրաինայի նախագահ Վոլոդիմիր Զելենսկին կրկին դիմել է միջազգային հանրությանը` կոչ անելով հնարավորինս արագ ՀՕՊ համակարգեր մատակարարել Ուկրաինային, ինչպես նաև սկսել պաշտոնական բանակցությունները Կիևի հետ Եվրամիությանն ու ՆԱՏՕ-ին անդամակցելու վերաբերյալ: