Ռուսաստանը խախտել է քիմիական զենքի օգտագործման միջազգային արգելքը, մայիսի 1-ին հայտարարել է ԱՄՆ պետքարտուղարությունը՝ հիմնավորելով Ռուսաստանի դեմ նոր պատժամիջոցների կիրառումը։ ԱՄՆ-ի արտաքին քաղաքական գերատեսչությունը պնդում է, որ ռուսական զորքերը Ուկրաինայի զինված ուժերի զինվորների դեմ կիրառել են քլորպիկրին, որը գրգռիչ ազդեցության թունավոր նյութ է։

«Նման քիմիական նյութերի օգտագործումը եզակի դեպք չէ և, հավանաբար, պայմանավորված է ռուսական ուժերի ձգտմամբ ՝ ուկրաինական զորքերը դուրս մղել ամրացված դիրքերից և մարտավարական հաջողությունների հասնել մարտի դաշտում», – նշված է Պետդեպարտամենտի հայտարարության մեջ: Գերատեսչության տվյալներով՝ խեղդող և արցունքաբեր քլորպիկրին նյութն օգտագործվել է նաև Ռուսաստանում՝ երկրի ներսում զանգվածային բողոքի ակցիաները ճնշելու շրջանակներում: