Ամերիկյան Freedom House կազմակերպությունը Ռուսաստանում անցանկալի է ճանաչվել, հաղորդել է ՌԴ գլխավոր դատախազությունը։
Անցանկալի կարգավիճակը նշանակում է, որ իշխանությունների կարծիքով` կազմակերպության գործունեությունը կարող է վտանգ ներկայացնել Ռուսաստանի սահմանադրական կարգի հիմքերին, երկրի պաշտպանունակությանը կամ անվտանգությանը։ Նման կազմակերպությունների գործունեությունը Ռուսաստանում արգելված է։
Անցանկալի կազմակերպության գործունեությանը մասնակցելը կամ դրա ֆինանսավորումը ենթակա է վարչական կամ քրեական պատասխանատվության մինչև հինգ տարի ազատազրկման։
Գերատեսչության տվյալներով՝ Freedom House-ի հիմնական գործողություններից է «աշխարհում Միացյալ Նահանգների, այսպես կոչված «գերիշխող» դերի հաստատման խթանումը և մասնակցությունը Ուկրաինայի հակամարտության վերաբերյալ «անբարյացակամ պետությունների» քաղաքականության խթանմանը, ներառյալ ռուսական բանակի վարկաբեկումը։
Գլխավոր դատախազությունը նշել է, որ կազմակերպությունն աջակցություն է ցուցաբերում ռուսական ընդդիմադիր կառույցներին, ահաբեկչության հոդվածներով դատապարտված անձանց և «արևմտամետ» ու ԼԳԲՏ ակտիվիստներին։
