ԱՄՆ-ն Վրաստանին սպառնացել է պատժամիջոցներով

ԱՄՆ-ը կարող է սահմանափակումներ մտցնել Վրաստանի իշխանությունների դեմ, եթե խորհրդարանի կողմից ընդունված օտարերկրյա գործակալների մասին օրինագիծը չփոխվի, և ղեկավարությունը շարունակի հարձակումները ԵՄ-ի և մյուս գործընկերների վրա, ասել է ԱՄՆ պետքարտուղարի օգնական Օ՚Բրայենը Թբիլիսիում կայացած ճեպազրույցում։

«Բոլոր ֆինանսական օգնությունները պետք է վերանայվեն, եթե մենք այժմ դիտվենք որպես հակառակորդներ, այլ ոչ թե գործընկերներ:

Եթե օրենքը մնա այնպիսին, ինչպիսին կա և չհամապատասխանի ԵՄ չափանիշներին, մենք կտեսնենք ժողովրդավարության խարխլում և բռնություն խաղաղ ցուցարարների նկատմամբ, բնականաբար կլինեն որոշակի սահմանափակումներ ԱՄՆ-ի կողմից, առաջին հերթին, այդ սահմանափակումները կազդեն ֆինանսական կողմի վրա»,- ընդգծել է նա։

Օ՚Բրայենը հավելել է, որ պատժամիջոցները, այդ թվում՝ տնտեսական, ինչպես նաև ճանապարհորդության սահմանափակումներ կկիրառվեն, եթե «Վրաստանի իշխանությունները շարունակեն հարձակումները ԵՄ-ի և մյուս գործընկերների վրա»։