ԱՄՆ-ն պատժամիջոցներ է սահմանել ՌԴ-ի նկատմամբ

ԱՄՆ ֆինանսների նախարարությունը պատժամիջոցներ է սահմանել Ռուսաստանի երկու քաղաքացիների և երեք ռուսական ընկերությունների նկատմամբ՝ համարելով, որ նրանք ներգրավված են ԿԺԴՀ-ից Ռուսաստան զենքի մատակարարման մեջ։ Այս մասին նշված է ԱՄՆ ֆինանսական գերատեսչության հայտարարությունում։

Վաշինգտոնի տուգանքներին են ենթարկվել Ռաֆայել Ղազարյանը և նրա հետ կապված «Տրանս կապիտալ» ու «Ռաֆորտ» ընկերությունները, ինչպես նաև Ալեքսեյ Բուդնևը և նրան պատկանող «Տեխնոլոգիա» ընկերությունը:

ԱՄՆ-ի ֆինանսների նախարարության վարկածով՝ Ղազարյանը որպես միջնորդ է հանդես եկել Ռուսաստանի պաշտոնյաների և Սլովակիայի քաղաքացի Աշոտ Մկրտիչևի միջև, որը բանակցություններ է վարել Փհենյանի հետ Մոսկվայի համար սպառազինություն գնելու շուրջ։

Ղազարյանը գործարքներ իրականացնելու համար օգտագործել է «Տրանս կապիտալ» ՍՊԸ-ն։ Մկրտիչևն ԱՄՆ-ի պատժամիջոցների ցուցակում ներառվել է 2023 թ. մարտին։

Իսկ Բուդնևն օգնել է Ռուսաստան մատակարարել ՌԴ-ի բանակի կարիքների համար ռազմական կապի միջոցներ, որոնք, ենթադրաբար, արտադրվել են Հյուսիսային Կորեայում, նշել են ֆինանսների նախարարությունում։

Պատժամիջոցները ենթադրում են ունեցվածքի և ակտիվների արգելափակում ԱՄՆ-ի տարածքում։

Բացի այդ, Միացյալ Նահանգներում ֆիզիկական և իրավաբանական անձանց արգելվում է բիզնես վարել պատժամիջոցների ցանկում նշված անձանց հետ:

Թիվ 1