ՏԿԵ փոխնախարար Քրիստինե Ղալեչյանն ԱԺ ՔՊ խմբակցության պատգամավոր Արսեն Թորոսյանի հարցին ի պատասխան հայտնել է, թե պլանավորել են 2 հիմնական մեծ թունելի նոր նախագծային աշխատանքներ սկսել․
«Խոսքը Պուշկինի և Դիլիջանի թունելների մասին է, դրանց վիճակը թե՛ անվտանգության, թե՛ մնացած տեսանկյուններից բարվոք չէ։ Օգտագործել ենք վարկային ծրագրերի խնայողությունները և միջազգային նախագծողին պատվիրակել ենք նախագծային աշխատանքներ»։
Ըստ նրա՝ այս պահին որոշում են ընդունել Պուշկինի թունելն ամբողջությամբ վերականգնելու վերաբերյալ․ «Իսկ Դիլիջանի թունելի մասով էլ կարևոր որոշում ենք կայացրել` նախատեսում ենք նորը կառուցել»։
Ըստ Ղալեչյանի՝ պլանավորել են երկու թունելի շինարարությունն իրականացնել միջազգային ծրագրերով. «Բարձր ստանդարտներ ենք որդեգրել․ թունելների կառուցման, վերակառուցման, անվտանգության շատ բարձր ստանդարտներ, և թունելները վերականգնելու ու կառուցելու ենք ԵՄ թունելների անվտանգության դիրեկտիվին ու ստանդարտներին համապատասխան»։
Փոխնախարարը նշել է, թե Պուշկինի թունելի հետ կապված՝ այս տարի մրցույթ կհայտարարվի, իսկ Դիլիջանի թունելի հարցով՝ հաջորդ տարի. «Հաջորդ տարվա այս ծախսերը արդեն պլանավորել ենք, սրանք մեր առաջնային ծրագրերից են»։
