«Տիգրանաշենը հանձնելով՝ մենք պատերազմը մոտցենում ենք, ոչ թե հեռվացնում։ Հայաստանի տարածքում ադրբեջանական անկլավը հնարավորություն է լինելու միջամտելու Հայաստանի գործերինմ նույնն էլ Տավուշի դեպքում»,- խորհրդարանական ճեպազրույցի ժամանակ ասաց ԱԺ «Հայաստան» խմբակցության պատգամավոր Իշխան Սաղաթելյանը։
Նա ընդգծեց, որ շարունակ վախեցնել և գնալ զիջումների, անընդունելի է իրենց համար։
Հարցին՝ Փաշինյանն ասել է Արծվաշենն են հետ բերելու, իրատեսակա՞ն է և կո՞ղմ են, որ փոխանակում տեղի ունենա, Սաղաթելյանն ասաց. «Ես Փաշինյանի իշխանության ընթացքում տեսել եմ միայն հանձնումներ։ Հայկական տարածքները հայկական տարածքներով չեն փոխանակվում։ Տիգրանաշենը հայկական տարածք է»։
Ընդդիմադիր ուժի ներկայացուցիչը նաև ասաց, որ ընդդիմության համախմբմանն այլընտրանք չի տեսնում։
«Կա իշխանություն, որն ունի արտաքին հսկայական աջակցություն, անսահմանափակ ռեսուրս, ուժային կառույցներ, որոնք աշխատում են օրենքից դուրս։ Սրան դիմադրելու համար ընդդիմադիր ուժերի համախմբումն անհրաժեշտություն է։
Համախմբումն առնվազն օրակարգային մի շարք հարցերի շուրջ անխուսափելի է, դա պետք է տեղի ունենա։ Առնվազն այն ուժերը, որոնք խուսափում են այդ համախմբումից, պետք է կարողանան հանրությանը պատշաճ բացատրություն տալ՝ ինչու»,- ասաց Իշխան Սաղաթելյանը։
