ԲՏԱ նախարար Մխիթար Հայրապետյանը տեղեկացրել է, որ ռուսական Առաջին ալիքի հեռարձակումը վերականգնվել է։ Նրա խոսքով, հեռուստաընկերությունը վճարել է պարտքը. «Մեզ համար կա մեկ կարմիր գիծ՝ ՀՀՌԾ-ին վճարվող գումարները, և բոլոր հեռուստաալիքները, որ իրենց ֆինանսական պարտավորությունները չեն կատարում, հետևում է սանկցիա։ Այդ սանկցիայի տակ ընկել են նաև հայկական հեռուստաալիքներ»։
Ռուսական հեռուստաալիքի պարտքը մոտ 2.5 մլն դրամ էր կազմել. «Մենք ստիպված էինք գնալ այդ քայլին, և ուրախությամբ պետք է ասեմ, որ հաջորդ օրը ռուսական ալիքը ամբողջությամբ մարեց պարտքը, և հեռարձակումը վերականգնվեց»։
Հայրապետյանը նաև ասել է, թե հայաստանյան մուլտիպլեքսում հեռարձակվող ռուսական ալիքների խոսույթի վերաբերյալ կներկայացվի Հայաստանի առաջարկները. «Թե ինչ առաջարկներ են դրանք, ես պոլիտկոռեկտ չեմ համարի հրապարակային քննարկել, կարևոր եմ համարում՝ նախևառաջ մեր ռուս գործընկերները ծանոթանան»։ Ըստ Հայրապետյանի՝ ինչ փոփոխություն էլ առաջարկել են միջպետական համաձայնագրում, դրանք միտված են ապահովելու մեխանիզմներ, որ խախտման պարագայում լինեն հետևանքներ։
