Թբիլիսիում հարձակվել են «Միացյալ ազգային շարժում» կուսակցության գրասենյակի վրա

Գիշերը հարձակում է տեղի ունեցել Թբիլիսիում խոշորագույն ընդդիմադիր կուսակցության՝ «Միացյալ ազգային շարժման» կենտրոնական գրասենյակի վրա։

Հարձակման փաստով Վրաստանի ՆԳՆ-ն քրեական գործ է հարուցել, հայտնում է Sputnik Грузия-ն։ ՆԳՆ-ից հայտնում են, որ քրեական գործ է հարուցվել «իրեր վնասելը կամ ոչնչացնելը» հոդվածով։

Նշվում է, որ անհայտ անձինք, մահակներով զինված, վնասել են կուսակցության շենքի ճակատային հատվածը, ջարդել ապակիներ և վնասել տեխնիկա։

Կուսակցության հայտարարության մեջ ասվում է, որ հարձակմանը մասնակցել է մոտ 100 մարդ։ Բացի այդ, նրանք կուսակցության անդամներին սպառնացել են բռնությամբ։