ԱԺ ՔՊ խմբակցության պատգամավոր Արսեն Թորոսյանը բարձրաձայնել է ձերբակալությունների և կալանավորումների հարցը։
«2023 թվականին տեղի է ունեցել 8625 ձերբակալություն, 2022-ին՝ 2693 ձերբակալություն, 2021 թվականին և դրանից առաջ՝ մոտավորապես հազար։ Լավ, սրա պատճառը ո՞րն է, ինչ-որ օրենք են փոխել, որ բոլորին պետք է պարտադիր ձերբակալել, նոր կալանավորել, նո՞ր ստորագրություն տաք։ Եթե նման բան կա, պետք է հետ փոխել, որ մարդիկ անհարկի չձերբակալվեն։ Կալանավորումներն էլ իրենց հերթին»,- ասել է նա՝ հավելելով․ «2018 թվականի համեմատ կալանավորումների կրկնակի ավելացում է եղել։ Եթե հանցավորությունը կրկնակի աճած լիներ, կասեի՝ հա, այդպես է եղել, դարձել ենք կրիմինալ Սիցիլիա։ Բայց ոնց որ Սիցիլիա չենք, լավ էլ անվտանգ երկիր է»։
ՔԿ նախագահի տեղակալ Արսեն Այվազյանն էլ պատասխանել է, որ օրենսդրական փոփոխությունների արդյունքում այժմ չկա բերման ենթարկելու ինստիտուտը, անձը ձերբակալվում է։
