Այսօր՝ հունիսի 9-ին, արտակարգ դեպք է տեղի ունեցել Լոռու մարզում։ Ժամը 08:00-ի սահմաններում ՀՀ Ներքին գործերի նախարարության Փրկարար ծառայության 911 ճգնաժամային կառավարման ազգային կենտրոն ահազանգ է ստացվել, որ Վանաձոր-Դիլիջան ավտոճանապարհի 1-ին կմ հատվածում քարաթափում է տեղի ունեցել, գրել է Shamshyan.com-ը։
Դեպքի վայր է ժամանել Վանաձորի թիվ 36 հրշեջ-փրկարարական ջոկատից 1 մարտական հաշվարկ։ Տեղում պարզվել է, որ մի քանի հսկայական քար է պոկվել ու հայտնվել ճանապարհի երթևեկելի գոտում, և դրանք հեռացնելու համար անհրաժեշտ է հատուկ տեխնիկա։
Լոռու մարզպետ Արամ Ղազարյանի հանձնարարականով ժամանել են նաև մարզպետարանի համապատասխան բաժնի աշխատակիցները։ Նրանք ուսումնասիրել են խնդիրը և պարզել, որ կա այլ քարերի թափվելու վտանգ, ու մարզպետի հանձնարարականով արդեն համապատասխան աշխատանքներ են կատարում` պարզելու համար, թե ինչ եղանակով է հնարավոր հեռացնել վտանգավոր քարերը։
