Գերմանիայի իշխանությունները չեն դիտարկում Բունդեսթագի արտահերթ ընտրությունների անցկացման հնարավորությունը։
«Երբեք, ոչ մի վայրկյան չի առաջացել այն միտքը, որ Գերմանիայում արտահերթ ընտրություններ կամ նման որևէ այլ բան անենք: Հաջորդ ընտրությունները նախատեսված են հաջորդ տարվա աշնանը», – ասել է Գերմանիայի կառավարության խոսնակ Շտեֆեն Հեբեշթրայթը՝ մեկնաբանելով Ֆրանսիայի նախագահ Էմանուել Մակրոնի՝ Ազգային ժողովը ցրելու որոշումը։ Նա նշել է, որ երկու երկրների քաղաքական համակարգերը շատ տարբեր են։
Գերմանիայում, Եվրախորհրդարանի ընտրությունների արդյունքներով, կոալիցիոն կուսակցությունները միասին ստացել են ձայների մեկ երրորդից քիչ պակաս։ Միաժամանակ, աջ պոպուլիստական «Այլընտրանք Գերմանիայի համար» կուսակցությունը հաղթել է կանցլեր Օլաֆ Շոլցի Սոցիալ-դեմոկրատական կուսակցությանը՝ ցույց տալով պատմության մեջ իր լավագույն արդյունքը դաշնային մակարդակով։
