Խաչատրյանը հույս ունի, որ Ադրբեջանը կարձագանքի խաղաղության պայմանագրին

Վարչապետի նորանշանակ խորհրդական, Լոռու նախկին մարզպետ Արամ Խաչատրյանը հայտարարել է, որ տարեսկզբին զբաղեցրած պաշտոնից ազատվել է անձնական պատճառներով․

«Ես չասացի՝ լավ մարզպետ եմ կամ վատ, ասացի, որ ես իմ անձնական պատճառներն եմ ունեցել ու ազատման դիմում գրել։ Հիմա վարչապետն առաջարկել է ինձ խորհրդականի պաշտոն, ինչի համար շնորհակալ եմ և համաձայնել եմ»,- ասել է նա։

Հարցին՝ ո՞ր ոլորտում է խորհուրդ տալու Փաշինյանին, նա նշել է, որ երբ վարչապետի հետ քննարկեն, թե ինչ ոլորտ է համակարգելու, հենց այդ ոլորտի շրջանակներում էլ կաշխատի։ Նա նշեց, որ նաև զինվորական է։

Խաչատրյանը խոսել է նաև խաղաղության օրակարգից՝ ասելով, թե դրանից չպետք է շեղվել։ Նա վստահություն է հայտնել, որ Ադրբեջանն էլ կարձագանքի խաղաղության պայմանագրի կնքմանը։