Կառավարության որոշմամբ 2.2 մլրդ դրամ կհատկացվի մարզպետարաններին՝ շինարարական կազմակերպությունների նկատմամբ ֆինանսական պարտավորությունները կատարելու համար:
Վարչապետ Նիկոլ Փաշինյանը նշել է, որ ծրագրերի իրականացման վայրեր այցելելիս կրկնվող խնդիրներ են նկատվում.
«Դրանցից ամենամեծն այն է, որ երբ նման օբյեկտ է շահագործվում, հասկանում ես՝ հետագա սպասարկման մասին չես մտածել»։
Նրա խոսքով՝ սուբվենցիոն ծրագրերում պետք է համապատասխան փոփոխություններ մտցվեն.
«Մարզերից մեկում բարեգործական ծրագրով մանկապարտեզ էր բացվել, ընդ որում՝ համացանցում լայնորեն տարածված էր մանկապարտեզի բացման հանդիսավոր արարողությունը, մեծ տոնախմբություն և այլն․ բայց 2 ամիս հետո պարզեցինք՝ մանկապարտեզը փակվել է, չի աշխատում։ Ի՞նչն էր պատճառը։ Պարզ չէ, թե ով է աշխատավարձ տալու մանկապարտեզի աշխատողներին, ով է կոմունալ վարձերը վճարելու և այլն։ Հետագայում երբ մենք սուբվենցիոն ծրագիր ներդրինք, պարտադիր պայման սահմանեցինք՝ սա համայնքի բյուջեներում պետք է անպայման արտահայտված լինի»։
Նրա խոսքով՝ զբոսայգիների դեպքում ևս խնամքի պակաս կա. «Գուցե այստեղ էլ պետք է լրացնենք»։
Դրանց ոռոգման, սպասարկման ծախսը պետք է արտահայտված լինի համայնքի բյուջեներում.
«Որովհետև մի 6 ամիս հետո պատահական ասում ես՝ մտնեմ, տեսնեմ՝ ինչ կա, գնում, տեսնում ես՝ 2 մետր մոլախոտ է աճած։ Ու սա առանձին վերցրած երևույթ չէ, այլ հաճախ պատահող»։
Նա շեշտել է, որ այդ աշխատանքները ոչ թե լուրերի համար են անում, այլ՝ մարդկանց։
