Վրաստանը մեկնաբանել է ԱՄՆ-ի և ԵՄ-ի պատժամիջոցները ռազմական ոլորտում

«Արժանի գործընկեր 2024» զորավարժությունները անորոշ ժամանակով հետաձգելու ԱՄՆ-ի որոշումը և Վրաստանի պաշտպանության նախարարությանը 30 միլիոն եվրոյի հատկացումը սառեցնելու ԵՄ-ի մտադրությունը, չեն խրախուսում Թբիլիսիի՝ արևմտյան գործընկերների հետ հարաբերությունները վերականգնելու ակնկալիքները։ Այս մասին կառավարության նիստում հայտարարել է Վրաստանի վարչապետ Իրակլի Կոբախիձեն։

«Այդ որոշումը ցավալի է։ Ես մեկ անգամ չէ, որ ափսոսանք եմ հայտնել, քանի որ այն չի արդարացնում մեր ակնկալիքները՝ կապված հարաբերությունների վերականգնման հետ»,-ասել է Կոբախիձեն։

Նա ընդգծել է, որ վերջին չորս տարիների քաղաքական իրադարձությունների պատճառով «այդ հարաբերություններն իսկապես վերանայման կարիք ունեն»։

«Վրացական կողմը, մեր կառավարությունը, պետությունը լիովին պատրաստ են դրան»,- ասել է վարչապետը։

Ինչպես նշել է Վրաստանի կառավարության ղեկավարը, նման պատժամիջոցների կիրառումը միշտ հակաարդյունավետ միջոց է հարաբերությունների վերակայման տեսանկյունից, սակայն նա հույս ունի, որ ապագայում ռացիոնալ, ճիշտ և արդար քայլեր կձեռնարկվեն, որոնք կօգնեն բարելավել երկրների միջև հարաբերությունները։

Հուլիսի 9-ին Թբիլիսիում ԵՄ դեսպան Պավել Գերչինսկին հայտարարել էր 30 միլիոն եվրոն սառեցնելու որոշման մասին, որը նախատեսվում էր հատկացնել Վրաստանի պաշտպանության նախարարությանը։

Նրա խոսքերով, կասեցվել է նաև հանրապետության՝ ԵՄ-ին միանալու գործընթացը։ԱՄՆ պաշտպանության նախարարությունը հուլիսի 5-ին հայտարարել է, որ վրաց-ամերիկյան «Արժանի գործընկեր» զորավարժությունները, որոնք նախատեսված էին 2024 թվականի ամռանը, անորոշ ժամանակով հետաձգվում են՝ ռազմավարական հարաբերությունների վերանայման պատճառով։