նախագահ Ջո Բայդենը կարծում է, որ իմաստ չունի Կիևին թույլ տալ ամերիկյան զենքերն օգտագործել Մոսկվային կամ Ռուսաստանի տարածքի խորքերը հարվածելու համար: Այս մասին նա հայտնել է Վաշինգտոնում կայացած ՆԱՏՕ-ի գագաթնաժողովն ամփոփող մամուլի ասուլիսում։
Նա նշել է, որ ԱՄՆ-ն Ուկրաինայի նախագահ Վոլոդիմիր Զելենսկիին թույլ է տվել ամերիկյան զենքերն օգտագործել սահմանափակ ձևով, Ռուսաստանի սահմանի մոտ։
«Եթե նա (Զելենսկին) ունենար հնարավորություն հարվածելու Մոսկվային, հարվածելու Կրեմլին, արդյո՞ք դա իմաստ կունենար, – ասել է ԱՄՆ նախագահը։
– Հարցն այն է, թե ինչպես լավագույնս օգտագործել նրա մոտ եղած զենքը, որը մենք մատակարարում ենք»։
Բայդենն արձանագրել է, որ Միացյալ Նահանգներն ավելի վաղ Կիևին է տրամադրել HIMARS համազարկային կրակի ռեակտիվ համակարգեր և այլ զինատեսակներ։
ՆԱՏՕ-ի անդամները տարբեր մոտեցումներ են որդեգրել Կիևի կողմից արևմուտքի մատակարարած զենքերի օգտագործման առումով։ Որոշ երկրներ հայտարարել են, որ Կիևը կարող է դրանք օգտագործել Ռուսաստանի խորքում թիրախներին հարվածելու համար։
ԱՄՆ-ն թույլ է տվել իր զենքերն օգտագործել միայն Ռուսաստանի հետ սահմանի երկայնքով, այն թիրախների դեմ, որոնց միջոցով իրականացվում են ռազմական գործողություններ Ուկրաինայում։
ՆԱՏՕ-ի գագաթնաժողովի ժամանակ Զելենսկին դաշինքի անդամներին կոչ էր արել վերացնել Ռուսաստանում գտնվող թիրախների դեմ հեռահար զենքերի օգտագործման սահմանափակումները՝ նշելով, որ դա կփոխի Մոսկվայի հետ պատերազմի ընթացքը։
ՆԱՏՕ-ի հիմնադրման 75-ամյակին նվիրված գագաթնաժողովը Վաշինգտոնում կայացել է հուլիսի 9-11-ը։
