Ռուսաստանի և Ուկրաինայի իշխանությունները հայտնել են մեկը մյուսի տարածքին հասցրած հարվածների մասին։
ՌԴ պաշտպանության նախարարությունը հայտարարել է, որ գիշերը երկրի հակաօդային պաշտպանության ուժերը խոցել են 13 ուկրաինական անօդաչու թռչող սարք Բելգորոդի, Ռոստովի, Կուրսկի և Վորոնեժի մարզերում, ինչպես նաև Սև ծովի ջրատարածքում։
Բելգորոդի նահանգապետը հայտնել է, որ Շեբեկինո քաղաքի և Նովայա Տավոլժանկա գյուղի գնդակոծությունների հետևանքով 4 խաղաղ բնակիչ է վիրավորվել։ Վնասվել են գազի և էլեկտրական հոսանքի մատակարարման գծերը։
Կուրսկի իշխանությունները հաղորդել են, որ ուկրաինական ԱԹՍ-ն հարվածել է մարզում տեղակայված ցածրավոլտ սարքավորումների գործարանին, որտեղ հրդեհ է բռնկվել։
Աշխատակիցներից ոչ ոք չի տուժել։ Ռոստովի իշխանությունները հայտնել են մարզի երկնքում 4 ԱԹՍ խոցելու մասին, տուժածներ և ավերածություններ չկան։
Իսկ Ուկրաինայի ռազմաօդային ուժերը գիշերը հայտնել են, որ ռուսական ԱԹՍ-ները հարվածներ են հասցնում Ուկրաինայի տարբեր նահանգների։
