Ուկրաինայի նախագահ Վլադիմիր Զելենսկին հայտարարել է, որ արևմտյան երկրների աջակցությամբ Ուկրաինան կարող է «ավարտին հասցնել պատերազմի թեժ փուլը մինչև այս տարեվերջ»․ այս մասին նա ասել է BBC-ին տված հարցազրույցում։
«Կարծում եմ՝ եթե մենք համահունչ գործենք և հետևենք Խաղաղության գագաթաժողովի ձևաչափին, կարող ենք վերջ տալ պատերազմի թեժ փուլին։ Մենք կարող ենք փորձել դա անել մինչև այս տարվա վերջ։ Պատերազմը կարող է ավարտվել բանակցությունների սեղանի շուրջ՝ դիվանագիտական կարգավորմամբ, եթե արևմտյան երկրները ճնշում գործադրեն Մոսկվայի վրա»,- ասել է Զելենսկին։
«Սա չի նշանակում, որ մենք պետք է կռվով ազատագրենք բոլոր տարածքները։ Կարծում եմ՝ դրան կարելի է հասնել նաև դիվանագիտական ճանապարհով»,- ասել է նա՝ հավելելով, որ միևնույն ժամանակ մարտի դաշտում Ռուսաստանի թուլացումը Ուկրաինային ավելի ամուր դիրք կապահովի բանակցությունների սեղանի շուրջ:
