Երևանը սեյսմիկ վտանգի քարտեզի վրա համարվում է 9 բալանոց գոտի. այս մասին այսօր հրավիրված ասուլիսի ժամանակ ասաց ՆԳՆ սեյսմիկ ծառայության տնօրեն Սոս Մարգարյանը՝ նշելով, որ խորհրդային տարիներին սեյսմիկ վտանգը թերագնահատված է եղել․
«Եթե այսօր կան 8, 9 և 10 բալանոց գոտիներ, սովետական քարտեզներով եղել են 7 և 8 բալանոց գոտիներ, և բնակֆոնդի մեծ մասը կառուցվել է 7 և 8 բալերի համար։ Եվ երբ ասում ենք՝ կա սեյսմիկ բարձր ռիսկ, պատճառը հենց դա է, որ շենքերը կառուցված են ավելի ցածր սեյսմիկ վտանգի մակարդակի համար, քան պետք է։ Հետևաբար, եթե 9 բալանոց երկրաշարժ լինի, 8 բալանոց գոտում գտնվող Երևանում կլինեն հետևանքներ»,- ասաց Մարգարյանը։
Հետևանքների մասին Մարգարյանը չցանկացավ թվերով խոսել, բայց նշեց, որ Երևան քաղաքի շենքերի մոտ կեսը բարձր խոցելիություն ունեն։
Սեյսմիկ ծառայության տնօրենն ասաց, որ մասնակցում են բազմաբնակարան շենքերի համալիր փորձաքննությանը։ Հարցին՝ 30 և ավել հարկ ունեցող շենքեր կառուցումը սեյսմիկ տեսանկյունից ճի՞շտ է, Մարգարյանն ասաց, որ ցանկացած շենք, շինություն եթե ճիշտ է հաշվարկվում, նորմալ է։
