«Մասիս Տոբակո»-ից 2 քաղաքացի տեղափոխվել են Էրեբունի» բժշկական կենտրոն

Օգոստոսի 12-ին արտակարգ դեպք է տեղի ունեցել Արարատի մարզում․ ժամը 15։15-ի սահմաններում ՀՀ Ներքին գործերի նախարարության ոստիկանության Մասիսի բաժին են զանգահարել «Էրեբունի» բժշկական կենտրոնից և հայտնել, որ «Մասիս Տոբակո»-ում բարձրությունից վայր ընկնելու հետևանքով «Գանգուղեղային վնասվածք հարցականով» ախտորոշմամբ ժամը 14։45-ի սահմաններում Մասիսի շտապօգնության խումբն իրենց մոտ բուժօգնության է տեղափոխել երկու քաղաքացու։

Shamshyan.com-ի հաղորդմամբ՝ ոստիկանները պարզել են, որ բուժօգնության տեղափոխված քաղաքացիները Արարատի մարզի բնակիչներ 42-ամյա Վիտալի Խ․-ն և 22-ամյա Արտեմ Օ․-ն են։

Ոստիկանները պարզել են նաև, որ նույն օրը՝ ժամը 14։00-ի սահմաններում, Մասիս Կայարանում գտնվող «Գրանդ Մաստեր» ՍՊԸ-ի տարածքում կառուցվող թղթի նոր արտադրամասում աշխատող՝ Վիտալի Խ․-ն և Արտեմ Օ․-ն էլեկտրական կառի վրա ամրացված մետաղյա հարթակի վրա մոնտաժման աշխատանքներ կատարելու ժամանակ բարձրությունից վայր են ընկել, որի հետևանքով ստացել են վնասվածքներ և տեղափոխվել «Էրեբունի» բժշկական կենտրոն:

Դեպքի փաստով ոստիկանության Մասիսի բաժնում ձևակերպվել են փաստաթղթեր, որոնք փոխանցվել են ՀՀ քննչական կոմիտեի Արարատի մարզային քննչական վարչության Մասիսի քննչական բաժին։

Նշվում է, որ Վիտալի Խ․-ն և Արտեմ Օ․-ն աշխատում են «Գրանդ Մաստեր» ՍՊԸ-ում՝ որպես էլ. տեխնիկներ։