Օգոստոսի լույս 16-ի գիշերը անօդաչուները գրոհել են Ղրիմը, հայտնում է ՌԴ պաշտպանության նախարարությունը իր Telegram-ալիքում։
Ռուսական կողմի տվյալներով՝ ՀՕՊ միջոցները Սև ծովի ջային ավազանի վրայով որսացել կամ խոցել են ինքնաթիռների տիպի ուկրաինական հինգ անօդաչու։ Բացի դրանից, հայտարարել է գերատեսչությունը, «հերթապահ կրակային միջոցները» ծովում ոչնչացրել են երկու նավ առանց անձնակազմի, որոնք շարժվում էին դեպի Ղրիմի թերակղզի:
Ուկրաինական «Կռիմսկի վետեռ» Telegram-ալիքը, հղում անելով բաժանորդներին, հայտնել է, որ պայթյուններ են լսվել Կերչում։
Քաղաքի կենտրոնում՝ Սովետսկայա փողոցում, բեկորների անկման հետևանքով, ինչպես գրում է ալիքը, վնասվել են մայթն ու ճանապարհը, ինչպես նաև «հավանաբար վնասվել են ենթակառուցվածքները»։
Սովետսկայա փողոցով երթևեկությունը մասամբ արգելափակված է, տեղում աշխատում են ոստիկանները, հաղորդում է «ՉՊ/Կռիմ» Telegram-ալիքը։
Ուկրաինական կամավորական «Հարավ» բանակի ներկայացուցիչ Սերգեյ Բրատչուկը պնդում է, որ Ղրիմի վրա գիշերային հարձակման հետևանքով, ըստ նախնական տեղեկությունների, վնասվել է Կերչի նավահանգստի լաստանավը և Չեռնոմորսկում գտնվող նավը։ Այլ աղբյուրներ չեն հաստատել այս տեղեկությունը։
