Եվրասիական տնտեսական հանձնաժողովի կենտրոնակայանում քննարկվել է Եվրասիական տնտեսական միությանը կից դիտորդ պետության կարգավիճակ ստանալու մասին Իրանի հարցումը:
Այդ հարցի շուրջ խորհրդակցություններն անցել են տեսակոնֆերանսի ձևաչափով՝ ԵՏՀ ինտեգրման և մակրոտնտեսության հարցերով նախարար Սերգեյ Գլազևի նախագահությամբ: ԵԱՏՄ անդամ պետությունները ներկայացվել են փոխարտգործնախարարների մակարդակով։
Իրանական պատվիրակությունը գլխավորել է ԱԳՆ բազմակողմ տնտեսական համագործակցության դեպարտամենտի պետ Սեյեդ Ջալալադդին Ալավի Սաբզևարին:
Խորհրդակցությունների մասնակիցները նշել են ԵԱՏՄ անդամ պետությունների և Իրանի միջև առևտրատնտեսական համագործակցության առաջանցիկ զարգացումը և ողջունել են ԵԱՏՄ-ում դիտորդ պետության կարգավիճակի դրույթին համապատասխան ԵԱՏՄ -ում դիտորդ պետության կարգավիճակ ստանալու ընթացակարգ նախաձեռնելու՝ երկրի մտադրությունը:
Նշենք, որ նման կարգավիճակ տրամադրելու մասին որոշումն ընդունվում է միության անդամ պետությունների ղեկավարների կողմից՝ Եվրասիական տնտեսական բարձրագույն խորհրդի նիստում։
