Ուկրաինայի արտաքին գործերի նախարար Դմիտրի Կուլեբան, որը հրավիրվել է ԵՄ երկրների արտաքին քաղաքական գերատեսչությունների ղեկավարների ոչ պաշտոնական հանդիպմանը, հանդիպումից առաջ պատասխանել է լրագրողների հարցերին։
Նախարարը, դիմելով ԵՄ երկրներին, ասել է, որ Ուկրաինային խոստացած զենքի հետաձգման հետ կապված միշտ տրվում են բացատրություններ.
«Միշտ կան բացատրություններ այս՝ հետաձգման հարցին: Սակայն խնդիրն այն է, որ այս ձգձգումների համար մենք վճարում ենք ավերածություններով և կորուստներով: Օգտվելով հնարավորությունից՝ ես կցանկանայի դիմել գործընկերներին, և հուսով եմ, որ իմ գործընկերները կհասկանան ինձ: Ես դիմում եմ երկրներին, որոնք մեկ ամիս առաջ խոստացել են մատակարարել Ուկրաինային Patriot համալիրներ: Մատակարարեք մեզ արդեն այդ համակարգերը, այդ սպառազինությունը գտնվում է պահեստում և պատրաստ է:
Ինչպիսին էլ լինեն այս ձգձգման պատճառները, եկել է մատակարարման ժամանակը: Մոտենում է աշունը, և երկուշաբթի օրը մենք ականատես եղանք ռուսական լայնածավալ ավիահարվածներին և հասկանում ենք, թե ինչպես կշարունակի Ռուսաստանը: Ես ևս մեկ անգամ կոչ եմ անում և խնդրում այդ երկրներին կատարել իրենց խոստումները»:
