ՆԱՏՕ-ի բոլոր երկրները չեն կարող ամբողջությամբ պաշտպանվել բալիստիկ հրթիռներից, քանի որ բախվում են հակաօդային պաշտպանության համակարգերի պակասի հետ, ERR հեռուստաալիքին ասել է Էստոնիայի պաշտպանության նախարար Հաննո Պևկուրը։
Պևկուրը մասնավորապես նշել է, որ ՆԱՏՕ-ի երկրների համար հակաօդային պաշտպանության կարողությունների ամրապնդումը չափազանց կարևոր է։
«Դեֆիցիտը, որն իրականում մեծ խնդիր է ՆԱՏՕ-ի բոլոր երկրների համար, բալիստիկ հրթիռներից պաշտպանվելու կարողությունն է, այսինքն՝ մինչև 20 կիլոմետր բարձրության և 150-200 կիլոմետր հեռավորության վրա հրթիռներ խոցելու կարողությունը», – ասել է նախարարը:
Էստոնիայի պաշտպանության նախարարն ավելի վաղ ասել էր, որ Էստոնիան կարող է ավելացնել պաշտպանական ծախսերը մինչև ՀՆԱ-ի 5%-ը՝ հիմնվելով ՆԱՏՕ-ի նոր պաշտպանական ծրագրի վրա, ռազմական հզորությունն ուժեղացնելու համար:
Մայիսին Financial Times-ը, հղում անելով դաշինքի պաշտպանական ծրագրերին ծանոթ աղբյուրներին, հայտնել էր, որ ՆԱՏՕ-ի երկրներն ունեն հակաօդային պաշտպանության համակարգերի միայն 5%-ը, որոնք անհրաժեշտ են իրենց արևելյան թևը պաշտպանելու համար:
