Թեհրանը դեմ է, որ Սյունիքում հաղորդակցությունները վերահսկեն երրորդ երկրների ներկայացուցիչները, լրագրողներին ասել է Հայաստանում Իրանի դեսպան Մեհդի Սոբհանին՝ մեկնաբանելով Ադրբեջան-Հայաստան-Նախիջևան ապագա հաղորդակցությունը վերահսկելու համար օտարերկրյա մասնավոր ընկերությունների ներգրավման հնարավորությունը։
Իրանի դեսպանի խոսքով՝ ՀՀ իշխանությունների հայտարարության համաձայն՝ սահմանային կետերում վերահսկողությունը կիրականացվի Հայաստանի լիազոր մարմինների կողմից։
«Մենք կողմ ենք, որ ամեն ինչ լինի Հայաստանի ինքնիշխանության շրջանակներում, ցանկացած վերահսկողություն լինի Հայաստանի կողմից: Մենք չենք աջակցում… որ այստեղ ժամանեն այլ երկրներից և փորձեն վերահսկողություն հաստատել կամ անվտանգություն ապահովել»,- ասել է Սոբհանին:
Նա նշել է, որ այս մասին խոսում են նաև Հայաստանի իշխանությունները՝ ամեն ինչ լինելու է Հայաստանի ինքնիշխանության շրջանակներում։ Այսպիսով, խոսքը անվտանգության ապահովման հարցը ինչ-որ միջազգային ընկերությանը փոխանցելու մասին չէ։
«Խոսքն այն մասին է, որ ինչ-որ առևտրային ընկերության ներկայացուցիչ կարող է ներկա լինել բեռների տեղափոխման ժամանակ: Ինձ փոխանցվել է, որ վերահսկողությունը, անվտանգությունը լինելու են Հայաստանի կառավարության կողմից»,- ասել է Սոբհանին։
