Անապա քաղաքի սրճարաններից մեկում երկու չեչեն երիտասարդներ փորձել են «ծանոթանալ ռուս աղջիկների» հետ: Վերջիններս «միասին զվարճանալու առաջարկությունը» մերժել են, ինչց հետո չեչեն երիտասարդները բռնություն են գործադրել, միջամտել են սրճարանում գտնվող տեղացիներ: Ոստիկանությունը չեչեն երիտասարդներին բերման է ենթարկել, նախնական քննությունը պարզել է, որ նրանք ծեծկռտուք են հրահրել, վիրավորել են ռուս աղջիկներին, նյութական վնաս պատճառել սրճարանատիրոջը: Միջադեպի հետեւանքով մի քանի հոգի մարմնական վնասվածքներ է ստացել, հարուցվել է քրեական գործ:
Չեչենների նկատմամբ խափաանման միջոց է ընտրվել երկամսյա կալանքը: Թվում է՝ արտառոց ոչինչ տեղի չի ունեցել, ցանկացած երկրում նման միջադեպեր լինում են: Բայց Չեչնիայի հատուկ նշանակության «Ահմատ» զորախմբի հրամանատար Ապտի Ալուիդինովը հայտարարել է, որ չեչեն երիտասարդները ոչ մի մեղք չունեն, ռուս աղջիկներն «անպատվել են նրանց ազգային ինքնությունը»:
Ալուիդինովը բացի «Ահմատ» զորախմբի հրամանատար լինելուց զբաղեցնում է ՌԴ պաշտպանության նախարարության Ռազմա-հայրենասիրական հարցերով գլխավոր վարչության պետի պաշտոնը, ԶՈՒ գեներալ-մայոր է: Կենցաղային միջադեպի վերաբերյալ նրա քաղաքական հայտարարությունը վկայում է, որ «հանրային համերաշխության» մասին Ռուսաստանի պետական քարոզչությունը շատ քիչ կապ ունի իրականության հետ:
Ալոիիդինովի հայտարարությանն անդրադարձել է ռուս զինվորական լրագրող Կոտենոկը եւ նրան քննադատել միակողմանի դիրքորոշման համար: Հասկանալի է, որ զինվորական թղթակիցը չէր կարող իրեն թույլ տալ հանդես գալու ՊՆ բարձրաստիճան պաշտոնյայի քննադատությամբ, նա, ամենայն հավանականությամբ, ուղղորդված է նույն գերատեսչությունից: Իսկ դա ակնհայտ վկայություն է, որ Ռուսաստանի նույնիսկ վերնախավում համերաշխություն չկա: Ուկրաինական պատերազմը շարունակվում է, լինելու են չափազանց սկանդալային բացահայտումներ։
