Իրանի Ազգային անվտանգության բարձրագույն խորհրդի քարտուղար Ահմադիանը մեկնել է Սանկ-Պետերբուրգ, որտեղ գումարվում է ԲՐԻԿՍ-ի անդամ երկրների անվտանգության հարցերով պատասխանատուների հանդիպում: Irna գործակալության տեղեկացվածությամբ, բացի բազմակողմ քննարկումներից, Ահմադիանը բանակցություններ կվարի Ռուսաստանի Անվտանգության խորհրդի քարտուղար Շոյգուի հետ:
Ըստ երեւույթին, Շոյգու-Ահմադիան հանդիպումը բացառապես նվիրված կլինի այսպես կոչված «Զանգեզուրի միջանցքի» հարցին: Օգոստոսի 5-ին Շոյգուն այցելել է Թեհրան, հանդիպել նաեւ նախագահ Փեզեշքիանին: Շոյգուն Մոսկվա վերադարձի ճանապարհին կանգ է առել Բաքվում: Ըստ երեւույթին, հենց այդ քննարկումների արդյունքում էլ Ռուսաստանի նախագահ Պուտինը Բաքու այց կատարելու որոշում է ընդունել: Իրանի խորհրդարանի արտաքին կալերի եւ անվտանգության հարցերով հանձնաժողովի նախկին նախագահ Ֆալահաթփիշեկը X սոցիալական հարթակում գրառում է կատարել եւ ասել, որ Ռուսաստանի նախագահ Պուտինը «Զանգեզուրի միջանցքի» հարցը հրատապ է դարձրել, որպեսզի խոչընդոտի Իրանի եւ Միացյալ Նահանգների հարաբերությունների կարգավորմանը:
Իրանցի նախկին խորհրդարանականի գնահատմամբ՝ Էբրահիմ Ռեիսիի կառավարությունը Միացյալ Նահանգների հետ հարաբերությունների կարգավորումը «զոհաբերել է Ռուսաստանի շահերին»: Նոր կառավարությունը փորձում է Մոսկվայի հետ հարաբերությունները հավասարակշռել: Նախօրեին Իրանի հետ հարաբերությունների հարցին անդրադարձել է ԱՄՆ պետքարտուղարության խոսնակ Պետելը: Նա ասել է, որ «լուրջ հետեւանքներ կլինեն, եթե հաստատվի, որ Իրանը Ռուսաստանին բալիստիկ հրթիռներ է մատակարարում»: Ասվածը թողնում է «գործարքի առաջարկի տպավորություն»:
Ընդ որում, Իրանի միջուկային ծրագրի շուրջ քննարկումների մտադրություն է հնչեցրել նաեւ Եվրամիության անվտանգության եւ արտաքին հարցերի գլխավոր հանձնակատար Բորելը: Իրանի ԱԳՆ պաշտոնական ներկայացուցիչ Քանանին սեպտեմբերի 9-ին ասել է, որ «Զանգեզուրի միջանցքի» թեման ակտուալացել է Ռուսաստանի նախագահի Բաքու այցից հետո: Չափազանց արտառոց է, որ, չնայած Իրանի հետ առկա տարաձայնություններին, վերջին շաբաթվա ընթացքում Թուրքիան որեւէ ձեւով այդ թեմային չի անդրադարձել: Այս ֆոնոին Բաթումում կաայցել է Թուրքիայի, Վրաստանի եւ Ադրբեջանի պաշտպանության նախարարների հանդիպում, որի մեկնարկին Վրաստանի եւ Ադրբեջանի պաշտպանության նախարարներն առանձնազրույց են ունեցել: Հանդիպման օրակարգում է նաեւ տարածաշրջանի անվտանգության հարցը: Ավելի քան մեկ շաբաթ է, ինչ իրանական կողմը տարբեր մակարդակներով անդրադառնում է Սյունիքում կոմունիկացիաների վերաբացման խնդրին եւ բարդ իրավիճակի համար հասցեագրումներ անում Ռուսաստանին, բայց Մոսկվայից արձագանք դեռեւս չկա: Թեհրանից տեսակետ է հնչել, որ եթե Մոսկվան դիրքորոշումը չվերանայի, ապա ռուս-իրանական համապարփակ համագործակցության պայմանագիրը կարող է չստորագրվել:
Իրանի Ազգային անվտանգության բարձրագույն խորհրդի եւ ՌԴ ԱԽ քարտուղարների բանակցություններն, ամենայն հավանականությամբ, վճռորոշ են լինելու: Եթե ռուս-իրանական պայմանագրի ստորագրումն առկախվի, ապա ԲՐԻԿՍ-ի գագաթաժողովին Իրանի նախագահի մասնակցությունը կդառնա անիմաստ: Այդ դեպքում ԲՐԻԿՍ-ի գագաթաժողովի կարեւորությունը կտուժի, իսկ Ռուսաստանի նախագահը փորձում է ֆոն ստեղծել, որ Արեւմուտքի հետ դիմակայության մեջ Գլոբալ հարավի աջակցությունն ունի: Վլադիմիր Պուտինի «զանգեզուրյան» մարշը, հնարավոր է, աշխարհաքաղաքական առումով վնասաբեր լինի: Ի՞նչ ընտրություն կկատարի նա: «Եթե ծեծկռտուքն անխուսափելի է, ապա խփիր առաջինը» պետերբուրգյան հետնաբակերի սկզբունքը նաեւ Հարավային Կովկասում կգործի՞:
