Թուրքական մամուլի տեղեկությունը, որ Ռուսաստանի նախագահ Պուտինը հոկտեմբերի առաջին օրերին կայցելի Անկարա, չի հաստատվում:
Տեղեկատվության աղբյուրը Թուրքիայի նախագահի աշխատակազմի անանուն աղբյուրն է, որ նաեւ բացահայտել է պատճառը: Ըստ իրավիճակին լավատեղյակ պաշտոնյայի՝ այցի հետաձգման պատճառը «տեխնիկական-արարողակարգային է»: Ռուսաստանի նախագահի աշխատակազմից նախապայման է դրվել, որ Պուտինի Թուրքիա թռիչքի ամբողջ ճանապարհին նրան պետք է ուղեկցեն ռազմա-տիեզերական ուժերի կործանիչները:
Մոսկվան այդ պահանջը հիմնավորել է թռիչքային երթուղու «վտանգավորությամբ»:
Պարզ ասած, Ռուսաստանի նախագահի անվտանգության ծառայությունը զգուշանում է, որ նրա ինքնաթիռը «կարող է ենթարկվել ուկրաինական կողմի հարձակմանը»: Ըստ աղբյուրի, Թուրքիան առաջարկել է Պուտինի ինքնաթիռին ընդառաջ իր կործանիչներն ուղարկել, բայց Մոսկվան պնդել է, որ ռուսական կործանիչները պետք է մինչեւ վայրէջքի պահ ուղեկցեն նախագահական թիվ մեկ բորտը:
Բայց այդ՝ Պուտինը հրաժարվել է կեցավայր ընտրել Անկարայի ամենաշքեղ երեք հյուրանոցներից մեկը, քանի որ դրանք ամերիկյան են: Այդ զգուշավորթյունը պայմանավորված է գաղտնալսման կասկածանքով: ՌԴ նախագահի աշխատակազմից առաջարկել են, որ Անկարայում մեկ գիշերվա համար Պուտինին հատկացվի Թուրքիայի նախագահի հյուրատունը: Քննարկումները շարունակվում են, բայց թուրք պաշտոնյան վստահ չէ, թե ռուսական կործանիչների մուտքը կարտոնվի, քանի որ դրա համար «հարկ կլինի մի քանի ժամով անջատել ՀՕՊ համակարգը, որ ՆԱՏՕ-ի հետ միասնական է»: Պուտինի Թուրքիա այցը քննարկվում է արդեն մեկ տարի:
Վերջին անգամ նա Անկարա է այցելել 2014 թվականին եւ, ըստ երեւույթին, մտադիր է Թուրքիայի նախագահի հետ հանդիպել Կազանում գումարվելիք ԲՐԻԿՍ-ի գագաթաժողովի շրջանակներում: Ցանկության դեպքում Պուտինը կարող է Անկարա մեկնել անվտանգ երթուղով՝ օգտագործելով Ադրբեջանի եւ Իրանի օդային տարածքը:
