Քիչ առաջ Վերաքննիչ քաղաքացիական դատարանի դատավոր Նորա Կարապետյանի աշխատակազմից տեղեկացա, որ Արա Մինասյանն ընդդեմ Արսեն Թորոսյանի գործով Արսեն Թորոսյանի և Առողջապահության նախարարության վերաքննիչ բողոքները մերժվել են։
Այս մասին ֆեյսբուքի էջում տեղեկացրել է Արսեն թորոսյանի ներկայացուցիչ Գեւորգ Գյոզալյանը՝ շարունակելով.
«Իհարկե, որոշումները ստանալուց հետո ավելի համապարփակ կներկայացնեմ իմ մասնագիտական կարծիքը (կրկին գործում է՝ «մենք դրել ենք, դատալեքսը ցույց չի տալիս» պարզունակ պատճառաբանությունը), բայց, մինչ այդ, ինձ շատ հետաքրքիր է, թե ինչ ձևով են տիկին Նորա Կարապետյանը, պարոններ Ամրահի Պետրոսյանն ու Սլավիկ Թորոսյանն աչք փակել ստորադաս դատարանի դատավոր Սարգիս Երիցյանի բացահայտ խախտումների վրա։ Լիահույս եմ, որ սույն դատավորները չեն գործել այնպես, ինչպես ստորադաս դատարանի դատավորը, իսկ եթե գործել են այդպես, ապա ես համառորեն իմ վստահորդին խորհուրդ կտամ այս որոշումը բողոքարկել, ընդհուպ մինչև ՄԻԵԴ, ինչպես նաև դիմել համապատասխան մարմիններին՝ դիտավորությամբ օրենք խախտած դատավորներին խստագույնս պատժելու պահանջով։
Հ.Գ. Ի դեպ, կարծում եմ՝ ուռճացված է տևական ժամանակ թևածող այն լուրը՝ իբրև գործադիր իշխանությունը ճնշում է դատական իշխանությանը, սա 37 թիվն է և այլն, ասել կուզի՝ իրո՞ք… Իսկ մի՞գուցե փորձենք իրապես հասկանալ, թե ինչ է կատարվում դատական համակարգում»:
