Ֆրանսիայի ԱԳՆ-ն խստորեն դատապարտել է իր քաղաքացի Թեո Կլերկ Հյուգոյի նկատմամբ ադրբեջանական դատարանի կայացրած կամայական եւ ակնհայտ խտրական վճիռը:
Թեո Կլերկ Հյուգոն Բաքվի մետրոպոլիտենի գնացքի արտաքին պատերին ֆլոմաստերով գրություններ թողնելու համար դատապարտվել է երեք տարվա ազատազրկման: Ընդ որում, այս տարվա մարտ ամսին նա ձերբակալվել էր Նոր Զելանդիայի եւ Աստրալիայի քաղաքացիների հետ: Դատարանը կալանքի որոշում է կայացրել միայն Ֆրանսիայի քաղաքացու նկատմամբ: Մյուս երկու օտարերկրացիները դատարանի կողմից ենթարկվել են տուգանքի՝ յուրաքանչյուրը 3 500 եվրոյի չափով: Ֆրանսիայի ԱԳՆ հայտարարության մեջ ոչ մի խոսք չկա Ադրբեջանի նկատմամբ պատասխան քայլերի մասին, բայց դա, ամենայն հավանականությամբ, չի նշանակում, թե պաշտոնական Փարիզը Բաքվի բացահայտ թշնամական վերաբերմունքը կթողնի անհետեւանք:
Ադրբեջանի նախագահ Իլհամ Ալիեւը պահանջել է, որ ԵԽԽՎ-ում ադրբեջանական պատվիրակության լիազորությունները վերականգնվեն, միայն դրանից հետո եվրոպացի պատգամավորների մուտքի արգելքը կվերացվի:
Նրան շատ կոշտ պատասխանել է ԵԽԽՎ-ում Գերմանիայի պատվիրակության ղեկավար Ֆրանկ Շվաբը. «Ես չգիտեմ, թե Ադրբեջանի նախագահին ով է խորհուրդներ տալիս, բայց ԵԽԽՎ հետ պահանջների լեզվով չեն խոսում: Ադրբեջանը պետք է կատարի Եվրոպայի խորհրդի անդամի իր պարտավորությունները»: Բաքվում Կլիմայի հարցերով խորհրդաժողովին ընդառաջ միջազգային հեղինակավոր իրավապաշտպան կազմակերպությունները բոլոր երկրների առաջնորդներին կոչ են արել, որպեսզի պահանջեն Ադրբեջանի բանտերում պահվող բոլոր քաղհալածյալների ազատ արձակումը: Պաշտոնական Փարիզի առաջին պատասխանը հայտնի է. Le Figaron, հղում անելով Ելիսեյան պալատի աղբյուրներին, գրել է, որ նախագահ Էմանուել Մակրոնը նոյեմբերին կայանալիք Կլիմայի հարցերով ՄԱԿ-ի միջազգային խորհրդաժողովին չի մասնակցի:
Ի՞նչ մակարդակով Փարիզը ներկա կգտնվի Բաքվի այդ միջոցառմանը՝ հայտնի չէ:
