Ադրբեջանցի սահմանադրագետ Ֆուադ Աղաեւն «անհիմն» է որակել վարչապետ Նիկոլ Փաշինյանի մտահոգությունը, որ Ադրբեջանի սահմանադրությունը, որով ներկայիս պետությունը ստանձնում է առաջին՝ ԱԺՀ իրավահաջորդությունը, Հայաստանի նկատմամբ տարածքային պահանջներ ունի: Աղաեւի մեկնաբանությամբ՝ միջազգային իրավունքը տարածքային առումով պետականության իրավահաջորդությունը ճանաչում է միայն այդ պետության անկախության անընդմեջ գոյության դեպքում: Եթե պետությունը կորցնում է անկախությունը, որ տեւում է տասնամյակներ, ապա տարածքի նկատմամբ նրա հավականությունը կորցնում է իրավական ուժը: Եւ երբ այդ պետությունը վերստին անկախություն է ձեռք բերում, ապա նրա տարածք է ճանաչվում այն, ինչ ունեցել է անկախության ձեռքբերման պահին: Ֆուադ Աղաեւն, ընդսմին, ասում է, որ ինքը եղել է Ադրբեջանի պետական անկախության վերականգման սահմանադրական ակտի մշակման աշխատանքային խմբի անդամ եւ ասում, որ փաստաթղթում 1918-20 թվականներին գոյություն ունեցած ԱԺՀ իրավահաջոդրության հիշատակումը «բացառապես խորհրդանշական իմաստ ունի»: Աղաեւն, այսպիսով, ասում է, որ ներկայիս Ադրբեջանի տարածքն այն է, ինչ ժառանգվել է Ադրբեջանական ԽՍՀ-ից, եւ դա բացարձակ ճշմարտություն է: Բայց այդ դեպքում ի՞նչ անել անձամբ Իլհամ Ալիեւի կողմից հովանավորվող «Արեւմտյան Ադրբեջան» կամ «Արեւմտյան Զանգեզուր» նախագծերի հետ, որ քարոզում են Հայաստանի տարածի մասնատում: Ֆուադ Աղաեւը փաստացի ժխտում է այդ նախագծերի օրինականությունը: Նա հանդես է գալիս ալիեւյան քարոզչության դեմ; ացառված չէ, որ մոտակա օրերին նա ձերբակալվի Հայաստանի «օգտին լրտեսության մեղադրանքով»: Երիտասարդ արեւելագետ, էթնիկ թալիշ Իգբալ Աբիլովն, օրինակ, կալանավորվել է, որովհետեւ հեռավար կապով մասնագիտական քննարկումներ է ունեցել Երեւանի պետական համալսարանի իրանագետ դասախոս Վարդան Ոսկանյանի հետ:
13:27
Հոկտեմբեր 28, 2026
