Ադրբեջանում՝ ինչպես միշտ

Ադրբեջանի ԿԸՀ-ն հաստատել է արտահերթ խորհրդարանական ընտրությունների ամփոփիչ արձանագրությունը: Սեպտեմբերի 2-ին հայտարարված նախնական արդյունքները մնացել են անփոփոխ, թեեւ 17 ընտրատարածքների 46 տեղամասերում քվեարկության արդյունքները ճանաչվել են անվավեր, մոտ երկու տասնյակ տեղամասային ընտրական հանձնաժողովներ լուծարվել են:

Կանխատեսումը, որ Ալիեւի իշխանությունը հենց այդ տարբերակով «ժողովրդավարություն» կխաղա, լիովին արդարանում է. մի կողմից «հաղթած» են ճանաչվում իշխանության թեկնածուները, մյուս կողմից դրա համար ընտրակեղծարարության դիմած մարդիկ «պատժվում են»: Յոթերորդ գումարման Միլլի մեջլիսում պատգամավորական 68 մանդատ բաժին է ընկնում Իլհամ Ալիեւի գլխավորած իշխող կուսակցությանը: 44 տեղ հատկացվել է այսպես կոչված «անկախներին»:

Նրանք բոլորն առանց բացառության սատարում են Իլհամ Ալիեւին: Մյուս մանդատները բաժին են ընկել «գրպանային ընդդիմություն» հանդիսացող տասնմեկ կուսակցության: Ադրբեջանում, ինչպես միշտ, խորհրդարան է ձեւավորվել «ընտրություն չկա, քվեարկությունը կայացել է» սկզբունքով:

Թեեւ այս անգամ արձանագրվել է ընտրություններին մասնակցության ամենացածր ցուցանիշը, պաշտոնական տվյալներով՝ 37,27 տոկոս: Անկախ դիտորդները վկայում են, որ իրականում քվեարկությանը մասնակցել է գրանցված ընտրողների ոչ ավելի, քան 25 տոկոսը:

Միլլի մեջլիսի նոր գումարումը նախորդներից տարբերվում է նաեւ նրանով, որ կիրառվել է «ժառանգական պատգամավորի» սկզբունքը. Սաբիր Ռուստամխանլիի փոխարեն «ընտրվել է» նրա կինը, իսկ քաղաքականությունից հեռացած Աղամալիին՝ փոխարինել դուստրը: Մոտ մեկ տասնյակ պատգամավոր ավելի վաղ պատգամավոր կամ նախարար պաշտոնավարածների ժառանգներ են:

ԿԸՀ-ն ամփոփիչ արձանագրությունն ուղարկել է Սահմանադրական դատարան: Ադրբեջանի օրենսդրությամբ քվեարկության արդյունքներն ուժի մեջ են մտնում միայն ՍԴ հաստատումից հետո: Հարցի քննարկման եւ վճիռ կայացնելու համար սահմանված է տասնօրյա ժամկետ:

Հիմնական ինտրիգը կայանում է նրանում, որ նորընտիր Միլլի մեջլիսը պետք է վավերացնի սահմանազատման հարցերով Հայաստանի եւ Ադրբեջանի հանձնաժողովների Կանոնադրությունը, որ կողմերն ստորագրել են օգոստոսի 30-ին:

Թիվ 1 սյունակ, Վահրամ Աթանեսյան