Ադրբեջանում զինվոր է սպանվել

Սեպտեմբերի 14-ին ադրբեջանական լրատվամիջոցները հայտնել են ԶՈՒ N զորամասի շարքային Նուրբալա Բաղիրովը «դեռեւս չպարզված հանգամանքներում մահացել է»: Կարճ ժամանակ անց տեղեկություն տարածվեց, որ Բաղիրովն «ինքնասպանություն է գործել»:

«Թուրան» գործակալությունը փաստի առթիվ իրարամերժ տեղեկությունները պարզելու համար գործի է դրել իրավապահ համակարգում ունեցած կապերը եւ պարզել, որ դեպքի կապակցությամբ Ադրբեջանի զինվորական դատախազությունում քր․օր․-ի 120.1 հոդվածով գործ է հարուցվել, տարվում է քննություն: Ադրբեջանի քր․օր․-ի հիշյալ հոդվածը պատասխանատվություն է սահմանում դիտավորյալ սպանության համար:

Հետեւաբար N զորամսի շարքային Նուրբալա Բաղիրովը ոչ թե մահացել կամ ինքնասպանություն է գործել, այլ սպանվել է: Այսքանով տեղեկատվությունն սպառվում է: Անցած օրերին Ադրբեջանի զինվորական դատախազությունը որեւէ հաղորդագրություն չի տարածել:

Անհայտ է, թե շարքային Բաղիրովին ով է սպանել, ինչ դրդապատճառներով, հարուցված գործի շրջանակներում կա՞ կասկածյալ, ձերբակալվա՞ծ է: Այս ամենը համադրելով՝ կարելի է եզրակացնել, որ Բաղիրովը սպանվել է ոչ թե ծառայակից զինվորի, այլ՝ անմիջական հրամանատարի կողմից: Բաքուն պարզապես իրողությունը չի հրապարակայնացնում:

Ադրբեջանական զինված ուժերում երկու նման դեպք հայտնի է. 2016թ. քառօրյա մարտերից հետո հրամանատարությունը հաշվեհարդար է տեսել Բեյլագանի եւ Թարթառի զորամասի մի քանի զինծառայողների հետ՝ նրանց մեղադրելով «հայկական կողմի օգտին լրտեսության» մեջ:

Թարթառի զորամասի գործով դատաքննությունը դեռեւս շարունակվում է: Նուրբալա Բաղիրովի սպանության փաստով նախնական քննություն իրականացրել է Շամքորի զինվորական դատախազությունը: Դա նշանակում է, որ նրա զորամասը մարտական հերթապահություն է իրականացնում հայ-ադրբեջանական սահմանի այդ հատվածում: Գուցե Բաղիրո՞վն էլ է սպանվել որպես «հայկական լրտես»:

Թիվ 1 սյունակ, Վահրամ Աթանեսյան