Ալիեւի քելբաջարյան շոուն եւ Ստեփանակերտի լռությունը.Աթանեսյան

Օրերս Նիդեռլանդների խորհրդարանը հանդես է եկել անցյալ տարվա սեպտեմբերի 19-ին Ադրբեջանի կողմից Լեռնային Ղարաբաղում իրականացված ահաբեկչական պատերազմի մասին հայտարարությամբ, որտեղ կատարվածը գնահատել է իբրեւ «Լեռնային Ղարաբաղի զավթում»: Համանման տեսակետ է արտահայտել նաեւ ԱՄՆ Զարգացման գործակալությունը: Ադրբեջանի նախագահի արտաքին քաղաքական հարցերով օգնական Հիքմեթ Հաջիեւը սեպտեմբերի 18-ին կազմակերպել է Բաքվում հավատարամագրված մի քանի դեսպանատների ներկայացուցիչների այցը «Քելբաջարի շրջան»: «ԱզերԹաջ» պետական գործակալության հաղորդմամբ՝ օտարերկրյա դիվանագետները եղել են Մատաղիսում եւ Սարսանգում: Մաատղիսը եւ Սարսանգը գտնվում են ԼՂ օկուպացված Մարտակերտի շրջանի տարածքում: Մատաղիսում եւ Թալիշում իրականացվել է բնակեցում: Այդ գյուղերում ոչ մի ադրբեջանցի նախկինում չի ապրել, ուստի երեւույթը ոչ այլ ինչ է, քան բռնատեղահանված հայ բնակչության վերադարձի իրավունքի խախտում, նրա թողած գույքի յուրացում: Պաշտոնական հաղորդագրությունը չի բացահայտում, թե Բաքվում հավատարմագրված ո՞ր երկրների դեսպանատներն են արձագանքել Հիքմեթ Հաջիեւի կազմակերպած «Այց ազատագրված Քելբաջար» քաղաքական շոուին: Երեւանում ներքաղաքական խնդիրներ քննարկող՝ Արցախի ներկայացուցիչները, մինչդեռ, Ադրբեջանի այդ եւ բազմաթիվ այլ քայլերի չեն արձագանքում: Ինչու՞ է լռում Ստեփանակերտը: