Ռուսաստանի և Ուկրաինայի միջև պատերազմը «ավելի մոտ է ավարտին», քան շատերը կարծում են, հայտարարել է Ուկրաինայի նախագահ Վլադիմիր Զելենսկին ABC News-ին տված հարցազրույցում ԱՄՆ կատարած այցի ժամանակ։
Նա նաև դաշնակիցներին կոչ է արել ուժեղացնել ռազմական օգնությունը։
«Հաղթանակի ծրագիրը Ուկրաինայի հզորացումն է։ Ահա թե ինչու ենք մենք մեր բարեկամներին, մեր դաշնակիցներին խնդրում հզորացնել մեզ։ Սա շատ կարևոր է։ Կարծում եմ՝ մենք ավելի մոտ ենք խաղաղությանը, քան կարծում ենք։ Մենք ավելի մոտ ենք պատերազմի ավարտին: Մենք պարզապես պետք է շատ ուժեղ լինենք»,- ասել է Զելենսկին։
Ուկրաինայի նախագահը նաև նշել է, որ Վլադիմիր Պուտինը «վախենում է» Կուրսկի մարզում Ուկրաինայի զինված ուժերի գործողություններից։
«Սա ճիշտ է: Նա շատ է վախենում։ Որովհետև նրա ժողովուրդը տեսավ, որ նա չի կարող պաշտպանել իր ողջ տարածքը»,- ասել է Զելենսկին։
Նա հավելել է, որ միայն «ուժեղ դիրքերից» Ուկրաինան կարող է «մղել Պուտինին դադարեցնելու պատերազմը»։
