Ռուսաստանն ինչպե՞ս կընդունի Իրանի նախագահի անակնկալը. Աթանեսյան

Իրանի նախագահ Մասուդ Փեզեշքիանը ՄԱԿ-ի Գլխավոր ասամբլեային մասնակցելու նպատակով Նյու-Յորքում է: «Ֆրանս-պրես» գործակալությունը հաղորդում է, որ նա ճեպազրույց է ունեցել լրագրողների հետ եւ ասել, որ Իրանը պատրաստ է եվրոպական երկրների եւ ԱՄՆ-ի հետ քննարկել ռուս-ուկրաինական պատերազմը: «Մենք երբեք չենք պաշտպանել ուկրաինական տարածքների դեմ Ռուսաստանի ագրեսիան»,-հայտարարել է Իրանի նախագահը: Օրեր առաջ Ռուսաստանի նախագահ Վլադիմիր Պուտինը հավանություն է տվել ռուս-իրանական համապարփակ համագործակցության մասին պայմանագրի նախագծին: Այդ փաստաթուղթը քննարկվում է արդեն մի քանի տարի եւ պետք է ստորագրվեր այս տարվա հունիսին, բայց Իրանի նախագահ Էբրահիմ Ռեիսիի ուղղաթիռի կործանման պատճառով հետաձգվել է: Վերջին շրջանում այսպես կոչված «Զանգեզուրի միջանցքի» շուրջ ռուս-իրանական տարաձայնությունները սրվել են: Մյուս կողմից եվրոպական երկրները նոր պատժամիջոցներ են սահմանել Իրանի դեմ՝ Ռուսաստանին ԱԹՍ-եր եւ բալիստիկ հրթիռներ մատակարարելու պատճառով: Իրանի նախագահը փաստացի հայտարարել է, որ եվրոպական երկրների եւ Միացյալ Նահանգների հետ պատրաստ է քննարկել Ռուսաստանին սպառազինությունների մատակարարումը դադարեցնելու հնարավորությունը, եթե իր երկրի դեմ պատժամիջոցները հանվեն: Մեկ ամիս հետո Իրանի նախագահը պետք է մասնակցի Կազանում գումարվող՝ ԲՐԻԿՍ-ի գագաթաժողովին, որի ընթացքում, ենթադրաբար, Ռուսաստանի հետ համապարփակ համագործակցության պայմանագիր պետք է ստորագրի: Ռուս-ուկրաինական պատերազմը որակելով ուկրաինական տարածքների դեմ Ռուսաստանի ագրեսիա՝ Իրանի նախագահը քաղաքական առումով համերաշխություն է հայտնում ոչ միայն Ուկրաինային, այլեւ նրա դաշնակից երկրներին: Ռուսաստանն ինչպե՞ս կընդունի Մասուդ Փեզեշքիանի անակնկալը՝ մնում է սպասել պաշտոնական Մոսկվայի արձագանքին: