ԼՂ-ից բռնի տեղահանված ուսանողների աջակցությունը կշարունակվի

2023 թվականի սեպտեմբերին ԼՂ-ից բռնի տեղահանված ուսանողների և մինչև 2023 թվականի բռնի տեղահանումը ՀՀ բուհերում սովորող ուսանողների համար աջակցության նոր ծրագիր է մշակվել:

Որոշման նախագիծը Կառավարության՝ սեպտեմբերի 26-ի նիստին ներկայացրեց ԿԳՄՍ նախարար Ժաննա Անդրեասյանը՝ նշելով, որ առաջարկվում է հստակեցնել անհրաժեշտ աջակցությունը մինչև կրթական մակարդակում ուսումնառության ավարտը, ինչը նշանակում է, որ մինչև ուսումնառության ավարտը ուսանողների աջակցության հնարավորություններն ընդլայնվում են:

«Ընդ որում՝ այս տարի աջակցությունը կտրամադրվի նույն պայմաններով և նույն հիմունքներով:

2025-2026 ուսումնական տարվանից, այսինքն՝ հաջորդ ուսումնական տարվանից նախատեսում ենք ներառել նաև միջին որակական գնահատականի կամ ՄՈԳ-ի շեմ՝ առնվազն 75 տոկոսի չափով, որը թույլ կտա նաև խրախուսել ավելի լավ առաջադիմությունը, ինչը առաջին հերթին հենց մեր ուսանողներին թույլ է տալիս ավելի լավ մասնագետ դառնալ և ավելի մրցունակ լինել իրենց նախընտրած ոլորտում»,- ասաց նախարարը:

Ըստ նախարարի՝ առաջարկվող փոփոխություններով հանվում է նաև ուսման վարձի փոխհատուցման առավելագույն սահմանաչափը:

«Պետք է հիշեցնեմ, որ նախորդ տարի այս կարգավորումը ներառել էինք, որպեսզի նպաստեինք ուսանողների՝ ավելի համաչափ բաշխմանը մեր բուհերում, սակայն հաշվի առնելով, որ խոսում ենք փաստացի սովորող ուսանողների մասին, ապա այս դրույթի անհրաժեշտությունը դուրս է գալիս:

Այս սահմանաչափի վերանայումը նաև հնարավորություն է տալիս, որ 100 տոկոս փոխհատուցում ստանան բոլոր այն դեպքերում, որտեղ նախորդ տարվա այս դրույթի պատճառով ամբողջական փոխհատուցում արդյունքում չէր ձևավորվում»,- ասաց նախարարը:

Անդրեասյանը կարևորեց նաև այն փաստը, որ այս աջակցությունը տարածվելու է նաև այս տարի բուհեր ընդունված, ինչպես նաև քոլեջներ ընդունված՝ ԼՂ-ից բռնի տեղահանված մեր հայրենակից ուսանողների համար. խոսքը շուրջ 180 ուսանողի մասին է:

«Նրանք նույնպես այս տարի այս նույն պայմաններով կունենան հնարավորություն՝ ուսման վարձի փոխհատուցում ստանալու կրթաթոշակի տեսքով, և նրանց համար նույնպես հաջորդ տարվանից կգործի ՄՈԳ-ի շեմը»,- ասաց նախարարը:

Անդրեասյանը նաև հիշեցրեց, որ նախորդ տարի այս որոշման շրջանակում 1-ին կիսամյակում 1834 բուհերի ուսանողների ուսման վարձ է փոխհատուցվել, իսկ 2-րդ կիսամյակում ուսանողների թիվը բուհական մակարդակում աճել է մինչև 2134-ը: Ինչ վերաբերում է արհեստագործական և միջին մասնագիտական կրթական ծրագրերով սովորողներին, ապա 1-ին կիսամյակում 919 սովորողի է փոխհատուցվել, իսկ 2-րդ կիսամյակում՝ 1133-ի:

«Այսինքն՝ այս որոշումը վերաբերում է հազարավոր ուսանողների՝ քոլեջներում և բուհերում, և նրանք այս որոշման ընդունմամբ կարող են վստահ լինել, որ ֆինանսական համապատասխան աջակցությունը կա, և նրանք կարող են կենտրոնանալ ուսման և դրա որակի վրա»,- ասաց նախարարը:

Փոխվարչապետ Մհեր Գրիգորյանը հետարքրքրվեց՝ քանի շահառու կա ծրագրով 2024-ին, Անդրեասյանը նշեց՝ շահառուների թիվը շուրջ 4000 է, նրանք բուհերի և քոլեջների ուսանողներ են: