Սեպտեմբերի 29-ին Ֆրանսիայում բնակվող ադրբեջանցի քաղաքական վտարանդի Վիդադի Իսկանդերլին մի խումբ անձանց կողմից ենթարկվել է հարձակման:
Նրա մտերիմները պատմել են, որ առավոտյան ժամը յոթի սահմաններում Մյուլուզ քաղաքում գտնվող նրա բնակարանի պատուհանը ջերդել, եւ երեք հոգի մուտք են գործել ննջարան: Նրանցից երկուսը դռների մոտ պահակ են կանգնել, երրորդը դանակով հարձակվել է: Իսկանդերլին դիմադրել է, այս իսկ պատճառով վերքերի զգալի մասը բաժին են ընկել ձեռքերին:
Հարձակվողին հաջողվել է դանակի հարված հասցնել Իսկանդերլիի գլխին: Այդուհանդերձ, նրան հաջողվել է ոստիկանություն կանչել, որից հետո հարձակվողները դիմել են փախուստի:
Նրանք եղել են դիմակավորված, միմյանց հետ չեն շփվել, տուժածը դժվարանում է ասել, թե ինչ ազգության են նրանք պատկանում, բայց համոզված է, որ պատվերն ստացվել է Ադրբեջանից:
Իսկենդերլին հայտնի է որպես ալիեւյան վարչակազմի կոշտ քննադատ, ինչի համար նա Ադրբեջանում քրեական հետապնդման է ենթարկվել, դատապարտվել ազատազրկման:
Փաստ է, որ Իլհամ Ալիեւը քաղաքական հակառակորդներին հետապնդում է նաեւ արտերկրում՝ որտեղ էլ նրանք ապաստան գտած լինեն:
Այս դեպքը, սակայն, ուշադրության է արժանի մեկ այլ՝ Ֆրանսիայի դեմ Ադրբեջանի թշնամական վերաբերմունքի առումով: Բացառված չէ, որ Իսկենդերլիի դեմ հարձակումը հետապնդում է Ֆրանսիայի իշխանություններին, իրավապահ համակարգը հեղինակազրկելու նպատակ:
Արեւմտյան հանրությունը նման դեպքերի նկատմամբ չափազանց զգայուն է նախ սեփական անվտանգության, ապա՝ իշխանությունների կողմից հանցագործությունը բացահայտելու կարողության:
Գործն ի՞նչ ընթացքի մեջ է, բացահայտվե՞լ են, արդյոք, հարձակվողները՝ առայժմ տեղեկություն չկա: Տուժածը գտնվում է տեղի բուժհաստատություններից մեկի վերակենդանացման բաժանմունքում:
Թիվ 1 սյունակ, Վահրամ Աթանեսյան
