Միացյալ Նահանգների պաշտպանության նախարարությունը նախատեսում է գնել էժան, մեկանգամյա օգտագործման անօդաչու թռչող սարքեր (ԱԹՍ), որոնք կարող են թռչել 50-300 կմ հեռավորության վրա: Այս մասին հայտնում է Defense News շաբաթաթերթը։
«Վերջին հակամարտությունները ցույց են տվել էժան, միանգամյա օգտագործման անօդաչու թռչող սարքերի ազդեցությունը ժամանակակից մարտադաշտում», – մեջբերում է հրատարակությունը Պենտագոնի պաշտպանության ինովացիոն գրասենյակի մեկնաբանությունը։
Ըստ Defense News-ի՝ Պենտագոնը նախատեսում է անօդաչու թռչող սարքերի առաջարկվող մոդելների ցուցադրական թռիչքներ իրականացնել արդեն դեկտեմբերին՝ դրանք գնահատելու համար։
Ինչպես պարզաբանել է հրատարակությունը, անօդաչու թռչող սարքերը, որոնց մասին խոսում է ամերիկյան պաշտպանական գերատեսչությունը, մեծ քանակությամբ օգտագործվում են Ուկրաինայում և Մերձավոր Արևելքում։
Գերատեսչությունից նշել են, որ շահագրգռված են անօդաչու թռչող սարքերի արտադրությամբ, որոնք կարող են առաջադրանքներ կատարել էլեկտրոնային պատերազմի, հետախուզության, հսկողության ոլորտներում։
Կարևոր է նաև, որ դրանք դժվար է հայտնաբերել և հագեցած են թռիչքների պլանավորման ծրագրային ապահովմամբ:
Պենտագոնը չի հստակեցրել, թե կոնկրետ քանի անօդաչու թռչող սարք են նախատեսում գնել և որքան կարող է լինել դրանց գինը՝ բացատրելով, որ նրանք հիմնականում կենտրոնանալու են յուրաքանչյուր առաջարկվող մոդելի գործառնական արդյունավետության վրա:
