ԵՄ խորհուրդը հավանություն է տվել պատժամիջոցների մեխանիզմի ստեղծմանը, որը կկիրառվի ի պատասխան Ռուսաստանի ապակայունացնող գործողությունների։
Այն Բրյուսելին թույլ կտա հետապնդել այն մարդկանց և կազմակերպություններին, որոնց գործողությունները խաթարում են ԵՄ-ի ու նրա անդամների, ինչպես նաև միջազգային կազմակերպությունների և երրորդ երկրների հիմնարար արժեքները, անվտանգությունը, անկախությունն ու ամբողջականությունը, հայտարարել է Եվրամիության խորհուրդը։
Ի թիվս այլ բաների, խոսքը վերաբերում է նաև հիբրիդային սպառնալիքներին, ինչպիսիք են ընտրական գործընթացների խափանումն ու ժողովրդավարական ինստիտուտների աշխատանքի խաթարումը, հանրային հետաքրքրություն ներկայացնող ծառայությունների և կրիտիկական ենթակառուցվածքների ընկերությունների դեմ սպառնալիքներն ու դիվերսիաները:
Այս առումով նշվում է նաև ապատեղեկատվության համակարգված օգտագործումը, կիբեռհարձակումները, միգրանտների նպատակային օգտագործումը որպես ապակայունացման գործիք։
Այս մեխանիզմի շրջանակներում նախատեսվում է ստեղծել պատժամիջոցների առանձին ցուցակ, որում կներառվեն ֆիզիկական և իրավաբանական անձինք։
Նրանց ակտիվները կսառեցվեն, իսկ ԵՄ-ի քաղաքացիներին ու ընկերություններին կարգելվի նրանց միջոցներ տրամադրել։ Այդ ցուցակում հայտնված մարդկանց կարգելվի նաև մուտք գործել Եվրամիության տարածք։
