Բոլոր երկրների ընդհանուր պետական պարտքն այս տարի, ըստ ակնկալիքների, կգերազանցի 100 տրիլիոն դոլարը, ինչը կկազմի համաշխարհային համախառն ներքին արդյունքի (ՀՆԱ) մոտ 93 %-ը։ Այդ մասին ասվում է Արժույթի միջազգային հիմնադրամի (ԱՄՀ) զեկույցում։
«Համաշխարհային պետական պարտքի ցուցանիշը շատ բարձր է: Ինչպես սպասվում է, 2024 թվականին այն կգերազանցի 100 տրիլիոն դոլարը (դա համաշխարհային ՀՆԱ-ի 93 %-ն է) և կաճի մինչև տասնամյակի վերջը (մինչև 2030 թվականն այն կհասնի ՀՆԱ-ի 100 %-ին)։
Թեև պարտքը, կանխատեսումների համաձայն, կկայունանա կամ կնվազի երկրների մոտ երկու երրորդում, սակայն այն կմնա զգալիորեն ավելի մեծ, քան սպասվում էր մինչև համավարակը», – զեկույցից հատված է մեջբերում ՏԱՍՍ-ը։
«Այն երկրներին, որոնցում չի կանխատեսում պարտքի կայունացում, բաժին է ընկնում աշխարհի պարտքի կեսից ավելին և համաշխարհային ՀՆԱ-ի մոտ երկու երրորդը: Ծանրակշիռ հիմքեր կան կարծելու, որ ապագայում պարտքի ցուցանիշները կլինեն ավելի բարձր, քան այժմ կանխատեսվում է: Վերջին տասնամյակներում բյուջեի հարցերի շուրջ քաղաքական քննարկումն ավելի ու ավելի է գնում կառավարության ավելի մեծ ծախսերի ուղղությամբ», – նշել են հիմնադրամի մասնագետները։
Փաստաթղթում չեն ներկայացվել առանձին երկրների պետական պարտքի ցուցանիշները կամ կանխատեսումները։
Ապրիլին ԱՄՀ-ի մասնագետները նշել էին, որ բոլոր երկրների պետական պարտքի մակարդակը 2023 թվականին աճել է «մոտ երկու տոկոսային կետով՝ հասնելով (խմբ.՝ համաշխարհային) ՀՆԱ-ի 93,2 %-ին»։
«Աճի առաջատարները եղել են երկու խոշորագույն տնտեսությունները՝ Միացյալ Նահանգները և Չինաստանը, որտեղ պարտքն աճել է ՀՆԱ-ի համապատասխանաբար ավելի քան երկու և վեց տոկոսային կետով», – պարզաբանել են հիմնադրամում:
