Եվրախորհրդարանը կարող է Ադրբեջանի դեմ պատժամիջոցներ սահմանող բանաձեւ ընդունել

Հոկտեմբերի 23-ին Եվրախորհրդարանի նիստում ելույթ է ունեցել ԵՄ զբաղվածության եւ սոցիալական իրավունքների հանձնակատար Նիկոլաս Շմիտը՝ ներկայանալով որպես Եվրոպայի խորհրդի անվտանգության եւ արտաքին քաղաքականության բարձր ներկայացուցիչ Ժոզեպ Բորելի բանախոս:

Շմիտի ելույթն ամբողջությամբ նվիրված է Ադրբեջանում մարդու իրավունքների վիճակին եւ Կլիմայի հարցերով ՄԱԿ-ի խորհրդաժողովին ընդառաջ՝ հայ-ադրբեջանական բանակցություններին:

ԵՄ հանձնակատարը հայտարարել է, որ Ադրբեջանի կառավարությունը պետք է ազատ արձակի բոլոր կալանավորվածներին, որ բռնության են ենթարկվել իրենց հիմնական իրավունքները պաշտպանելու պատճառով:

Եվրախորհրդարանի պատգամավորն արձանագրել է, որ Ադրբեջանում անազատության մեջ գտնվող քաղաքական այլախոհները զրկված են պատշաճ բժշկական օգնությունից, նրանք ենթարկվում են անհատական նվաստացումների եւ բռնությունների:

Հատուկ ընդգծվել է խաղաղության քարոզիչ Բահորւզ Սամեդովի ձերբակալությունը, որ մեղադրվում է Հայաստանի օգտին լրտեսության մեջ միայն այն պատճառով, որ միջազգային մամուլում հանդես է եկել հայ-ադրբեջանական խաղաղության պայմանագիր ստորագրելու օգտին հոդվածներով:

Նիկոլաս Շմիտը նաեւ անդրադարձել է Կլիմայի հարցերով ՄԱԿ-ի խորհրդաժողովի ընձեռած հնարավորությանը, որպեսզի Ադրբեջանը եւ Հայաստանը հասնեն խաղաղության համաձայնագրի ստորագրման:

Նա վերահաստատել է գործընթացին Եվրամիության աջակցության պատրաստակամությունը, ինչպես նաեւ հավաստիացրել, որ ԵՄ-ն պատրաստ է «կայուն խաղաղության պահպանման անհրաժեշտ ռեսուրսներ տրամադրե» Եվրոպայում ադրբեջանական վտարանդիության աղբյուրները տեղեկացնում են, որ Եվրախորհրդարանում տասնյակ պատգամավորների նախաձեռնությամբ բանաձեւ է շրջանառվում, որով ադրբեջանցի մի շարք պաշտոնյաների նկատմամբ «պատժամիջոցներ են նախատեսվում»:

Խորհրդարանականները Եվրոպայի խորհրդին կոչ են անում վերանայել Ադրբեջանի հետ կնքված էներգետիկ համաձայնագրերը:

Ըստ տեղեկությունների, այդ բանաձեւը կարող է քվեարկության դրվել հոկտեմբերի 24-ին:

Եվրախորհրդարանում տեղի ունեցած քննարկումները եւ բանաձեւի շրջանառումը, սակայն, Ադրբեջանի նախագահի արտաքին քաղաքական հարցերով օգնական Հիքմեթ Հաջիեւը համարել է «Հայաստանի ազդեցության տակ հայտնված մի խումբ պատգամավորների կողմից Ադրբեջանի դեմ զրպարտություն»:

Թիվ 1 սյունակ, Վահրամ Աթանեսյան