Վրաց ժողովրդի համար Ռուսաստանը բարեկամական երկիր չէ

Վրաստանի խորհրդարանական ընտրություններից ակնկալիքների վերաբերյալ ռուսաստանյան «Նեզավիսիմայա գազետան» ուշագրավ խմբագրական է հրապարակել, որտեղ խիստ կասկածելի է գնահատված Ռուսաստանի քաղաքական շատ գործիչների եւ փորձագետների տպավորությունը, որ իշխանության մնալու դեպքում «Վրացական երազանք» կուսակցությունը «կխորացնի Ռուսաստանի հետ հարաբերությունները»:

Թերթը համոզմունք է հայտնում, որ ռուս-վրացական հարաբերությունների խորացման ճանապարհին առկա է երկու «մեծ խոչընդոտ՝ Աբխազիան եւ Հարավային Օսեթիան»:

Ընտրություններից մեկ շաբաթ առաջ ՌԴ արտգործնախարար Լավրովն ասել է, որ Մոսկվան երբեք եւ ոչ մի գնով չի վերանայի վրացական երկու ինքնավարությունների «անկախության ճանաչման որոշումը»:

«Նեզավիսիմայա գազետան» քննադատում է Ռուսաստանի իշխանություններին, որ Հարավային Կովկասի երկրների հետ «համակարգված աշխատանքի փոխարեն նախընտրում են հենվել հավատարիմ մարդկանց վրա»:

Հեղինակի գնահատմամբ՝ «առայժմ դա հաջողվում է միայն Ադրբեջանում, բայց ոչ մի երաշխիք չկա, որ այն կոնյունկտուրային չէ»:

Հեղինակավոր պարբերականը կանխատեսում է, որ Հարավային Կովկասում Ռուսաստանի ազդեցությունը «շարունակաբար նվազելու է»:

Կոնկրետ Վրաստանի դեպքում «եթե անգամ «Երազանքը» մնա իշխանություն, ապա սկսելու է ԱՄՆ եւ Եվրամիության հետ հարաբերությունների վերբեռնում, որովհետեւ ներկա իրավիճակում Ռուսաստանը վրաց ժողովրդի համար բարեկամական երկիր չէ»:

Խորհրդարանական ընտրությունների նախօրեին Վրաստանի վարչապետ Կոբախիձեն ասել է, որ Արեւմուտքի «ազդեցիկ գործընկերներից դրական ազդակներ են ստացել»:

Թիվ 1 սյունակ, Վահրամ Աթանեսյան