Ռուսաստանը կտրականապես մերժում է իր հասցեին մեղադրանքները՝ կապված Վրաստանի խորհրդարանական ընտրություններին միջամտելու հետ, հայտարարել է ՌԴ նախագահի մամուլի քարտուղար Դմիտրի Պեսկովը։
«Մենք կտրականապես մերժում ենք նման մեղադրանքները։ Դրանք ստանդարտ բնույթ են կրում շատ երկրներում: Գրեթե անմիջապես Ռուսաստանին մեղադրում են միջամտության մեջ։ Ոչ, դա այդպես չէ: Ոչ մի միջամտություն չի եղել։ Մեղադրանքները բացարձակապես մերկապարանոց բնույթ են կրում»,- լրագրողներին ասել է Պեսկովը՝ պատասխանելով համապատասխան հարցին։
Մեկնաբանելով Վրաստանում խորհրդարանական ընտրությունների արդյունքները՝ նա ասել է, որ «դա վրաց ժողովրդի ընտրությունն է»։
«Այժմ շատ կարևոր է, որ ոչ մի երրորդ երկիր չմիջամտի այս ընտրությունների արդյունքներին։ Նույն տիկին նախագահը (Սալոմե Զուրաբիշվիլին) ասել է, որ չի ճանաչում այս ընտրությունների արդյունքները։ Չգիտեմ՝ արդյոք Վրաստանի նախագահի լիազորությունների մեջ մտնո՞ւմ է ընտրությունները ճանաչելը կամ չճանաչելը»,- ասել է Պեսկովը։
«Ամեն դեպքում, այս ամենը ներվրացական թեմա է»,- հավելել է նա։
