Իսրայելի կողմից հոկտեմբերի 26-ի գիշերային հարձակումներից հետո Իրանը պահանջում է ՄԱԿ-ի Անվտանգության խորհրդի արտահերթ նիստ հրավիրել:
Պաշտոնական Թեհրանի գնահատմամբ՝ Իսրայելը «խախտել է ՄԱԿ-ի Կանոնադրությունը, միջազգային իրավունքի նորմերը եւ պետք է պատասխանատվության ենթարկվի»:
Իսլամական հանրապետության առաջնորդները գերազանց գիտեն, որ ՄԱԿ-ի ԱԽ մշտական անդամ է Իսրայելի մերձավորագույն դաշնակից ԱՄՆ-ը, որ վետոյի իրավունք ունի եւ թույլ չի տա, որ հրեական պետությունը պատժամիջոցների ենթարկվի:
Ըստ էության, ԱԽ մշտական անդամ եւ ոչ մի երկիր Իսրայելին պատժելու սկզբունքային շահ չունի:
Իսրայելա-իրանական հակամարտությունը կարելի է համարել «փակված էջ»:
Վերջին օրերին իսրայելական մամուլում հաճախ է խոսվում այն մասին, որ Իրանի միջուկային ծրագրի հարցում հրեական պետությունը «շատ ուշացել է, այն կասեցնելու ոչ մի հնարավորություն այլեւս չկա»։
Ընդ որում, իսրայելցի մեկնաբաններն ընդունում են, որ Իրանի միջուկային օբյեկտներին հարվածելու սեփական միջոցներ Թել-Ավիվը չունի, իսկ ԱՄՆ-ը չի տրամադրում:
Ասվածը պարզ ակնարկ է, որ Միացյալ Նահանգները «շահագրգռված են, որպեսզի Իրանը լինի միջուկային տերություն»:
Միջուկային զենք կա նաեւ Իսրայելում: Այսպիսով, ինչպես ենթադրում են իսրայելցի շատ փորձագետներ, ԱՄՆ-ը ստեղծում է «ուժային հավասարկշռություն»:
Կողմերից ոչ մեկն «այլեւս մյուսին չի կարող սպառնալ երկրի երեսից ջնջելու հեռանկարով»:
Ազգային անվտանգության, պատերազմի, իսրայելա-պաղեստինյան եւ իսրայելա-իրանական հակամարտության հարցերում իսրայելական մամուլը, փորձագետները եւ վերլուծաբանները չափազանց պահպանողական են, երկրում գործում է նաեւ ռազմական գրաքննության խիստ ռեժիմ:
Եւ եթե նման իրավիճակում իսրայելցի փորձագետները խոսում են Իրանի միջուկային զենքի «առկայությունից» եւ համարում, որ հետագա ծրագիրը կասեցնելու հնարավորություն չկա, պետք է ենթադրել, որ Մերձավոր Արեւելքում սպասվում են աշխարհաքաղաքական վերադասավորումներ:
Թիվ 1 սյունակ, Վահրամ Աթանեսյան
