«Դեւլեթ Բահչելիի կողմից Օջալին արված առաջարկությունը դեռեւս ուժի մեջ է: Պարոն Էրդողանը պաշտպանել է այդ նախաձեռնությունը, բայց մենք առ այսօր չգիտենք, թե ինչ տեսակետ ունի «Արդարություն եւ զարգացում» կուսակցությունը Օջալանի կողմից Քրդական բանվորական կուսակցությանը զենքը վայր դնելու կոչ անելու վերաբերյալ»,- գրում է «Turkgazetesi»-ի մեկնաբանը:
Խոսքն այն մասին է, որ Թուրքիայի «Ազգայնական շարժում» կուսակցության առաջնորդ Դեւլեթ Բահչելին, որ Էրդողանի կոալիցիոն գործընկերն է, խորհրդարանում դիմել է քրդամետ DEAM կուսակցության խմբակցությանը եւ ասել, որ պատրաստ է հնարավորություն ստեղծել, որպեսզի Քրդական բանվորական կուսակցության ցմահ ազատազարկման դատապարտված առաջնորդը ելույթի հնարավորություն ունենա եւ հայտարարի, որ ցրում է կուսակցությունը եւ դադարեցնում անկախ Քուրդիստանի համար Թուրքիայի դեմ զինված պայքարը:
Բահչելիի այդ հայտարարությունից երկու օր անց Թուրքիայի ռազմա-արդյունաբերական համալիրի ամենահայտնի ձեռնարկությունը՝ TAI-ը «ենթարկվել է ահաբեկչական հարձակման»:
Քրդական բանվորական կուսակցությունը «հարձակման համար պատասխանատվություն է ստանձնել»:
Թուրքիան Իրաքի եւ Սիրիայի հյուսիսում «հակաահաբեկչական գործողություններ է սկսել»:
Այդուհանդերձ, չկա հստակ պատասխան, թե ով կամ ինչն է դրդել, որ ՔԲԿ-ն «ահաբեկչություն իրականացնի»:
Մանավանդ որ ձեռնարկության ոչ մի վնաս չի հասցվել, բայց այն, որ հինգ աշխատակից սպանվել է, ավելի քան երկու տասնյակը՝ վիրավորվել: Ըստ պաշտոնական վարկածի՝ գործել են «մահապարտ ահաբեկիչները»: Բայց թե ինչու՞ նրանք չեն պայթեցրել որեւէ հոսքագիծ կամ արտադրանքի պահեստ՝ արտառոց է:
Կազանից տունդարձի ճանապարհին Թուրքիայի նախագահ Էրդողանը ճեպազրույց է ունեցել իր թիմի լրագրողների հետ: Անկարայի «ահաբեկչության» առթիվ նա ասել է, որ Իսրայելը Մերձավոր Արեւելքում իրականացնում է «տարածքներ նվաճելու անեոսիոնիստական քաղաքականություն» եւ ավելացրել, որ Թուրքիան «երբեք թույլ չի տա, որ սահմանների մոտ ահաբեկչական պ ետություն ստեղծվի»։
Էրդողանի խոսքի ենթատեքստն այն է, որ Իսրայելը, ի հակակաշիռ Պաղեստինի անկախ պետություն հռչակելու Թուրքիայի պահանջի, նրա սահմանների մոտ «տարածքներ է ազատում, որպեսզի քրդական պետություն ստեղծվի» եւ այդ հարցում վայելում է Միացյալ Նահանգների աջակցությունը:
Թուրքիայի նախագահի կանխատեսումը կամ կռահումը բավական հիմնավոր է. միայն անկախ Քուրդիստան հռչակելու կամ այդ նախագիծն առնվազն միշտ թարմ պահելու միջոցով է հնարավոր զսպել Մերձավոր Արեւելքում Էրդողանի նոր-օսմանական հավակնությունները:
Խնդիրն այն է, որ Իսրայելը տարածաշրջանում Միացյալ Նահանգների բացահայտ հովանավորյալն է, իսկ Թուրքիան՝ ՆԱՏՕ-ի անդամ, ԱՄՆ ֆորմալ դաշնակիցը:
Ստացվում է, որ լայնածավալ բախում թույլ չտալու համար Վաշինգտոնը պետք է կարողանա կառավարել թե Իսրայելի, թե Թուրքիայի տարածաշրջանային քաղաքականությունը:
Առայսօր դա, կարծես, հաջողվել է կամ գոնե հարաբերականորեն հաջողվում է: Բայց չկա երաշխիք, որ Թուրքիան «կարմիր գիծը» չի հատի:
Էրդողանը մի քանի ամիս առաջ սպառնացել է, որ զորք կմտցնի Գազա, եթե «ցեղասպանությունը չդադարեցվի»:
Գազայում ոչինչ չի փոխվել: Էրդողանի գործադրած դիվանագիտական ջանքերն Իսրայելին չեն զսպում: Թուրքիան Իսրայելի դեմ ռազմական քայլ կձեռնարկի՞:
Թիվ 1 սյունակ, Վահրամ Աթանեսյան
