Ադրբեջանի սահմանապահ ծառայությունն աննախադեպ հաղորդագրություն է տարածել. հոկտեմբերի 26-ին ռուս-ադրբեջանական սահմանին ձերբակալվել է 36-ամյա տղամարդ, որ փորձել է «ապօրինի ճանապարհով Ադրբեջանից անցնել Ռուսաստան»:
Նրան հայտնաբերել են ապրանքատար գնացքի վագոնում՝ «բեռների մեջ թաքնված վիճակում»։
Հրապարակվել է «չարանենգ սահմանախախտի» ինքնությունը: Նա Խաչմազի շրջանի բնակիչ Թամինդար Անվարովիչ Լումանովն է:
Փաստի առթիվ իրականացվում են «օպերատիվ-քննաչական գործողություններ»:
Ավելի պարզ ասած՝ Լումանովի նկատմամբ «պետական սահմանն ապօրինի հատելու փորձի» մեղադրանքով քրեական գործ է հարուցվել:
2020թ. փետրվարից Ադրբեջանի կառավարությունը հարեւան բոլոր երկրների՝ ՌԴ, Իրանի, Վրաստանի եւ անգամ Նախիջեւանի հատվածում Թուրքիայի հետ ցամաքային եւ Կասպից ծովի տարածքային ջրերի սահմանը փակ է պահում:
Իրավիճակն այնքան սուր է, որ Իրանի նախագահը վերջերս Ադրբեջանի փոխվարչապետ Մուստաֆաեւի հետ հանդիպմանը խորհուրդ է տվել «սահմանին պատնեշներ չկառուցել, այլ հնարավորություն տալ, որ մարդի շփվեն»:
Ըստ երեւույթին, մարդիկ ընտրել են սահմանն ապօրինի հատելու տարբերակը՝ ելնելով սոցիալական վիճակից: Խաչմազի բնակչի ինքնությունից հասկացվում է, որ նա էթնիկ լեզգի է: Ադրբեջանի էթնիկ փոքրամասնությունների բնակության վայրերում սոցիալ-տնտեսական վիճակը պարզապես աղետալի է:
Լումանովն, այդպիսով, փորձել է ապրանքատար գնացքով հատել Ռուսաստանի հետ սահմանը, մուտք գործել Դաղստանի ինքնավարություն, որտեղ, գուցե, կկարողանար աշխատանք եւ ապրուստի միջոցներ գտնել: Այժմ նրան սպասում է առնվազն երեք տարվա ազատազրկում:
Փաստը վկայում է, որ Ադրբեջանի լեզգիաբնակ շրջաններում մարդիկ ձգտում են տեղափոխվել հարազատ Դաղստան: Բռնաճնշումներն այնքան մեծ են, որ իրենց իրավունքների մասին Ադրբեջանում բարձրաձայնել նրանք չեն կարող:
Թիվ 1 սյունակ, Վահրամ Աթանեսյան
