Անգլիական «Մանչեսթեր Սիթիի» և Իսպանիայի ազգային հավաքականի կիսապաշտպան Ռոդրին France Football-ի վարկածով ճանաչվել է այս տարվա աշխարհի լավագույն ֆուտբոլիստ և արժանացել «Ոսկե գնդակ» մրցանակին:
Ֆրանսիայի մայրաքաղաք Փարիզի Շատլե թատրոնում կայացած մրցանակաբաշխության ժամանակ 28-ամյա ֆուտբոլիստին մրցանակը հանձնել է պատմության միակ «Ոսկե գնդակի» աֆրիկացի դափնեկիր Ջորջ Վեան:
Ռոդրին նախորդ մրցաշրջանում «Մանչեսթեր Սիթիի» հետ հաղթել էր Անգլիայի Պրեմիեր լիգայում, իսկ ամռանն Իսպանիայի ազգային հավաքականի հետ Գերմանիայում նվաճել Եվրոպայի առաջնության չեմպիոնական տիտղոսը:
Նախորդ անգամ աշխարհի լավագույն ֆուտբոլիստի մրցանակը իսպանացիներից ստացել էր կատալոնական «Բարսելոնայի» նախկին հարձակվող Լուիս Սուարեսը` 1960 թվականին:
Ռոդրիին լավագույն քառյակում հաջորդել են Մադրիդի «Ռեալի» խաղացողներ, բրազիլացի Վինիսիուս Ժունիորը, անգլիացի կիսապաշտպան Ջուդ Բելինգեմը և իսպանացի պաշտպան Դանի Կարվախալը:
«Ռեալի» պատվիրակությունը բոյկոտել է «Ոսկե գնդակի» մրցանակաբաշխությունը և չի ժամանել Փարիզ:
